ElaseThekwini lizovula nompetha kwi-SA20

LIYAKHULA isasasa ngaphambi kokuqala kwesizini yesine yomqhudelwano omkhulu wekhilikithi yohlobo lweT20, iBetway SA20.

Umdlalo wokuqala uzobanjelwa eNewlands Cricket Ground, eKapa, ngoLwesihlanu ngo-5.30 ntambama.

Uzobe uphakathi kweqembu elidle isicoco kwisizini yesithathu esongwe ngoFebhuwari nonyaka, iMI Cape Town, nelizinze eThekwini, iDurban’s Super Giants, elaqeda endaweni yesibili ngonyaka odlule.

Umqeqeshi weSuper Giants, uLance Klusener, owaqala ukucija leli qembu ngesikhathi kusungulwa lo mqhudelwano ngo-2023, ulindele okuhlukile eqenjini lakhe kulandela indali eyayibanjwe ngoSepthemba eyaholela ekutheni inqwaba yabadlali bashintshe amaqembu.

Kuyona iSuper Giants yahlomula ngabadlali abasha okubalwa kubona u-Aiden Markram, owayengukaputeni weSunrisers Eastern Cape ngesikhathi inqoba izicoco ezimbili kulandelana ngo-2023 nangonyaka odlule, abashwibi uGerald Coetzee noKwena Maphaka, inkakha yaseNew Zealand uKane Williamson nabanye.

“Sibe nendali enkulu kulo nyaka ngemuva kweminyaka emithathu lo mqhudelwano waqala ngakho-ke kunezinguquko eziningi eqenjini lethu. Kufanele silihlele kahle iqembu lethu ukuze sibone ukuthi umdlali ngamunye uzodlala yiphi indima. Into okufanele siyiqinisekise ukuthi bonke abadlali bayakuthola abakudingayo eqenjini,” kusho uKlusener.

Umqeqeshi weMI Cape Town, uRobin Peterson, uthe nakuba behlose ukusivikela isicoco ngeke kube lula njengoba wonke amaqembu enezikwati eziqinile.

“Ngeke ngisho ukuthi ngiyayazi imfihlo yokunqoba lo mqhudelwano ngoba ukube kunjalo ngabe ngiyafunga ukuthi sizonqoba isicoco sethu sesibili. Sizosebenza kanzima, sakhe iqembu elizovumela bonke abadlali ukuthi badlale ngendlela efanele,” kusho uPietersen.

ISuper Giants izodlala umdlalo wokuqala wasekhaya ngoDisemba 28 lapho izophinde idudulane khona neMI Cape Town eKingsmead ngo-3.30 ntambama.