UBroos uhlabeke umxhwele ngoNdamane ngaphambi kowe-Afcon
UMDLALI wasemuva kwiBafana Bafana, uKhulumani Ndamane, umqeqeshi uHugo Broos ahlabeke umxhwele ngaye
Image: BACKPAGEPIX
UMA kuya ngamagama omqeqeshi weBafana Bafana, uHugo Broos, umdlali wasemuva uKhulumani “Mtara” Ndamane, akayile nje ukuyogcwalisa isikhala eqenjini leBafana elizoyibamba kwi-Africa Cup of Nations (Afcon), eMorocco.
IBafana izovula ne-Angola emdlalweni ka-Group B eMarrakech Stadium ngoMsombuluko ngo-7 ebusuku.
UNdamane udlale kahle ngesikhathi iBafana iguqisa iGhana ngo 1-0 emdlalweni wobungani ngoLwesibili, eDobsonville Stadium, eSoweto, obesekungumdlalo wokugcina weqembu lesizwe lakuleli ngaphambi kokubhekisa amabombo eMorocco.
Kulo mdlalo obekubukeka uBroos ezwa amanzi ngobhoko ngawo ngaphambi komdlalo wezakhe wokuvula we-Afcon, ubophele uNdamane noNkosinathi Sibisi odongeni lwasemuva maphakathi nendawo.
Yize uNdamane (21) engakabi yisethenjwa odongeni lwasemuva lweBafana njengoMbekezeli Mbokazi kodwa ukudlala kwakhe ngonyawo lwesokunxele kumbeka ethubeni lokuthola isikimu kwi-Afcon.
UBroos akamthathi uNdamane njengomdlali ozogcwalisa isibalo kodwa uthembele kuyena ukuthi angangena ayibambe uma kwenzeka ejutshwa.
“Okokuqala; ngicabanga ukuthi kubalulekile ahambe neBafana (uNdamane) ukuya kwi-Afcon. Okwesibili; nginelisekile ngendlela asadlale ngayo umdlalo nomdlalo, okubalwa nawo lona esiwudlale neGhana.
"Ngijabule kakhulu ngaye. Ngakho ngiyazi ukuthi uma kukhona okwenzekayo odongeni lwethu lwasemuva, nakanjani ngingathembela kuyena.
"Uyazi, kule minyaka emibili edlule sinqobe imidlalo ngoba sinabadlali ebhentshini abakwazile ukungena bashintsha umdlalo,” kusho uBroos ngemuva komdlalo wobungani neGhana.
Lolu nkonko lo mdlali oludabuka KwaNomoya, eSahlumbe, kungenzeka lusheshe ludingeke esikimini sikaBroos uma iBafana ibhekana namazwe ashaya ngabagadli abade.
Ngale kwalokho, ukwenza kahle kukaNdamane kulo mqhudelwano webhola omkhulukazi wase-Afrika, kungambeka ethubeni lokuthatha amehlo ezinhloli zamaqembu aphesheya njengabanye ozakwabo ayibambe nabo odongeni lwasemuva okubalwa kubo uSamukele Kabini odlala kwiMolde FK yaseNorway, uSiyabonga Ngezana odlala kwi-FCSB yaseRomania noMbokazi osanda kujoyina iChicago Fire yase-USA.