AmaProteas asezolwela ukulingana ne-India kowe-T20
UKAPUTENI weqembu le-T20 lamaProteas esilisa, u-Aiden Markram.
Image: X / PROTEAS MEN
IQEMBU lakuleli lekhilikithi labesilisa selizolwela ukungahlulwa ochungechungeni lwe-T20 elidudulana kulona ne-India uma la maqembu esebhekene emdlalweni wokugcina namuhla.
Lo mdlalo uzoqala ngo-3.30 ntambama eNarendra Modi Stadium, eMotera.
Umdlalo uzoqala i-India ihamba phambili ngo 2-1. Inqobe umdlalo wokuqala ngama-run angu-101, amaProteas athatha owesibili ngama-run angu-51, ngaphambi kokuthi i-India inqobe owesithathu ngamawikhethi ayisikhombisa.
Umdlalo wesine obekumele ube se-Ekana Cricket Stadium, eLucknow, ngoLwesithathu, awuqalanga ngenxa yokungcola komoya.
Lokhu kuchaza ukuthi amaProteas asedinga ukuwunqoba owanamuhla ukuze uchungechunge luphele zibambene ngo 2-2.
Uma i-India iwuthatha izonqoba ngo 3-1 kanti uma umdlalo uphazamiseka osokhaya bazophuma phambili ngo 2-1.
Khonamanjalo: AmaProteas esifazane azobe esedlalela ukuyinqoba yomithathu imidlalo yochungechunge lwama-One Day International (ODI) njengoba ezobhekana ne-Ireland kowokugcina eWanderers Cricket Stadium, eGoli, namuhla ngo-2 ntambama.
Iqembu lakuleli selivele lilunqobile lolu chungechunge ngenxa yokuthatha umdlalo wokuqala ngamawikhethi ayisikhombisa e-East London, ngoMgqibelo, nowesibili ngama-run angu-74 eGqeberha, ngoLwesibili.