OweSundowns Ladies uvume ubunzima benqoba iSuper League
ABADLALI beMamelodi Sundowns Ladies nethimba labaqeqeshi bebhiyozela ukuzuza indebe yeHollywoodbets Super League emuva kokuguqisa i-TS Galaxy Quees ngo 4-0 eLucas Moripe Stadium, e-Atteridgeville, ngempelasonto
Image: MAMELODI SUNDOWNS LADIES FACEBOOK
UMDLALI wasemuva kwiMamelodi Sundowns Ladies, uBambanani Mbane, uyichaze njengebinzima isizini abayisonge ngokuwina isicoco seligi seHollywoodbets Super League.
ISundowns iqinisekiswe njengompetha besizini ka-2025 yeSuper League ngokubhaxabula i-TS Galaxy Queens ngo 4-0 wamagoli amabili kaMunashe Mugwara, uNthabiseng Majiya no-Asanda Hadebe eLucas Moripe Stadium, e-Atteridgeville, ngeSonto. Igoduke nesheke lika-R2 million.
ISundowns esikhonye isikhathi eside kuleli ligi kazwelonke yebhola labesifazane, isiphakamise okwehlandla lesithupha isicoco seSuper League kusukela yasungulwa le ligi ngo-2019 isabizwa nge-Women’s Soccer League.
Leli qembu eliqeqeshwa nguGodfrey “Godfather” Sapula ongene endaweni kaJerry Tshabalala, linqobe iligi ngamaphuzu angu-77. Ilandelwe yiJVW ngawu-69.
Abanyana ba Style bazodlala umdlalo wokugcina ne-Ezemvelo Women’s FC owahlehliselwa usuku olungaziwa.
“Ngijabule ngokunqoba kwethu isicoco seSuper League kodwa bekungeyona isizini elula. Yingakho ngijabule ngokuthola le ndondo yegolide. Njengeqembu sikwazile ukufeza lokhu ebesifuna ukukufeza,” kusho uMbane obefake ibhande likakaputeni bephakamisa indebe.
“Isizini iphelile kodwa kwabanye bethu umsebenzi yima uqala ngoba siyawazi umgomo esizibekele wona. Lokho okusho ukuthi lesi sikhathi samaholidi okuphela konyaka sizofana nazo zonke nje izikhathi zonyaka kithina.”
Yize leli qembu lasePitoli liqhubekile nokukhonya nakule sizini kwiSuper League kodwa iGalaxy Queens ne-JVW bayimise kabi uma kuqhathaniswa namasizini edlule ikakhulukazi okufakazelwa wukuncipha kwegebe lamaphuzu enqobe ngalo.