OweChiefs uchazekile ngoBaartman obeqala ukudlala
ULUKE Baartman odlale okokuqala kwiKaizer Chiefs ibhekene neTS Galaxy koweBetway Premiership eMbombela Stadium, eNelspruit, ngeSonto
Image: BACKPAGEPIX
UMQEQESHI weKaizer Chiefs, uKhalil Ben Youssef, uhlabeke umxhwele ngendlela adlale ngayo uLuke Baartman emdlalweni wakhe wokuqala ngesikhathi leli qembu libhekene neTS Galaxy emdlalweni weBetway Premiership.
UBaartman (19) udlale okokuqala edlubhe ijezi leChiefs kulo mdlalo ophele zibambene ngo 0-0 eMbombela Stadium eNelspruit ngeSonto.
Ungene sekusele imizuzu engu-11 kuphele umdlalo endaweni kaLehlogonolo Matlou.
Lo mgadli nozakwabo, u-Asanele Velebayi, ngo-Okthoba bagcine bekhululekile ukubhaliswa ngokusemthethweni njengabadlali beChiefs ngemuva kokungenelela komxazululi weSafa ozimele kulandela umdonsiswano obuphakathi kwaleli qembu laseSoweto neCape Town Spurs ebinqaba ukubakhulula.
“Ngicabanga ukuthi bonke abadlali esinabo eqenjini bayadinga ukunikwa ithuba. Sinesikwati esikhulu manje, mkhulu umbango wejezi kubadlali. Ngakho thina njengabaqeqeshi esisebenza nabo ejimini yithina esikwaziyo ukubona ukuthi yibaphi abakulungele ukudlala,” kusho uBen Youssef ephendula umbuzo ngokufakwa kukaBaartman koweGalaxy.
“Uma sihlela iqhinga lomdlalo yithina futhi esaziyo ukuthi yibaphi abadlali okufanele sibafake ngezikhathi ezifanele njengoba uBaartman simfake sekusele imizuzu engu-10 kuphele umdlalo kodwa wenza le nto esiyifunayo, wakha amathuba okushaya amagoli ngesikhathi esincane esenkundleni.
Ngihlabeke umxhwele ngaye kodwa kuzofanele siqhubeke sisebenze ngoba into ebaluleke kakhulu yiqembu kunabadlali.”
UBaartman, odlale kwiNdebe yoMhlaba yeFifa ka-Under 20 eChile ngoSepthemba, udlale umdlalo wakhe wokuqala. UVelebayi usedlale emine egqoke ijezi laMakhosi okubalwa emibili yePremiership nemibili yeCaf Confederation Cup.
UBen Youssef uyivumile inkinga ebhekene nezakhe yokwehluleka ukuqeda umsebenzi phambi kwamapali okuyiyona ebacekele phansi bebambana ngo 0-0 neChippa United ngoLwesithathu.
“Ngicabanga ukuthi sidlale kahle kakhulu kodwa sikhathazekile sonke ngokulahla amaphuzu kule midlalo emibili esiqeda kuyidlala ngoba asiwasebenzisi ngendlela amathuba esiwakhayo.
Kuzomele siqhubeke sisebenze ekulungiseni le nkinga esibhekene nayo (yokugeja amagoli)," kusho uBen Khalil.
Amakhosi azobuyela ensimini ngemuva kwekhefu le-Africa Cup of Nations (Afcon) ngomdlalo wasekhaya neLamontville Golden Arrows ngoJanuwari 20 eFNB Stadium eNasrec.