Ibuye nefike nakho iChiefs eMpumalanga
ULEBOGANG Maboe weKaizer Chiefs eshikilisana noMpho Mvelase weTS Galaxy emdlalweni weBetway Premiership eMbombela Stadium, eNelspruit, izolo ntambama
Image: BACKPAGEPIX
TS Galaxy (0) 0
Kaizer Chiefs (0) 0
IKAIZER Chiefs iphinde yalahla ithuba lokuqinisa indawo yayo embangweni wesicoco seligi yeBetway Premiership idlala ngokulingana neTS Galaxy emdlalweni wePremiership obuseMbombela Stadium, eNelsrpuit, ngeSonto ntambama.
IChiefs ilahla amaphuzu nje, kungokwesibili imidlalo ilandelana njengoba kube ngesifanayo nangoLwesithathu ibambana ngo 0-0 neChippa United. Lokhu kwenze yaya eMbombela imagange ngokubuya namaphuzu amathathu.
Ukuwina kweChiefs izolo bekuzokwenza igudluze iSekhukhune United endaweni yesithathu. Ukuhluleka kwayo kusho ukuthi isonga unyaka esendaweni yesine kwi-log ngamaphuzu angu-24 emidlalweni engu-13. Isele ngelelidwa kwiSekhukhune esendaweni yesithathu ngawu-25 emidlalweni elinganayo.
Ngakolunye uhlangothi, lo mphumela usho ukuthi i-The Rockets ayikagudluki endaweni yesishiyagalombili ngamaphuzu angu-21 emidlaweni engu-14.
Amakhosi yiwona athole amathuba amaningi kulo mdlalo, ikakhulukazi ngesiwombe sokuqala, okubalwa nebhola elibi likaKhanyisa Mayo elivinjwe ngunozinti weGalaxy, u-Ira Tape sekuvalwe amehlo.
Kanti ngaphambi kwalokho Amakhosi abe neshwa ngegoli ebelibukeka licacile ebelivalelwe phakathi uFlavio Silva kodwa unompempe obephethe umdlalo, wathi yi-off side.
I-The Rockets iwatholile amathuba ambalwa ngesiwombe sesibili okubalwa kuwo ibhola elivinjwe uDillan Solomons esusa umhlola ekhaya ngokuchiliza ibhola kumgadli uJunior Zindonga obesephunyukile sekusele abhekane nonozinti uBrandon Petersen.
UZindonga obewuhlupho ucishe waphula izinhliziyo zabalandeli baMakhosi ngomzuzu ka-90 esephume qekelele kodwa ibhola lakhe lishaya ipali selimdlile uPetersen.
Amakhosi azobuyela ensimini ngemuva kwekhefu le-Africa Cup of Nations (Afcon) ngomdlalo wasekhaya neLamontville Golden Arrows ngoJanuwari 20 eFNB Stadium, eNasrec.