Injabulo izikole zaseKZN zithola izinsiza zekhilikithi
ABAFUNDI baseSinqeni Primary School naseBonginhlanhla High School, oPhongolo, abakhelwe indawo yokudlala ikhilikithi bathola nezinye izinsiza
Image: SITHUNYELWE
KUNETHEMBA lokuthi izikole ezakhelwe izindawo zokudlala ikhilikithi zaphinde zagixabezwa ngezinye izinsiza zizokhiqiza abadlali abazomela isifundazwe nezwe lonkana emiqhudelwaneni emqoka.
IKZN Cricket Union nabaxhasi iHollywood Foundation bavule lezi zikhungo ngokusemthethweni ezifundeni ezehlukene maphakathi nesonto.
Le ngqalasizinda ihlanganise indawo yokubhetha ebiyelwe ngamanethi kanti abadlali abasebancane baphinde banikwa namaphini okubhetha nezinye izinto zokuzivikela uma udlala ikhilikithi.
“SiyiKZN Cricket Union sithanda ukubonga iHollywood Foundation ngokuxhasa izikole nemiphakathi yethu ngezinsiza zekhilikithi. EMajuba kufakwe indawo yokubhetha namanethi eSiphumelele Primary School, Osizweni,” kusho uSanelisiwe Khuzwayo oyiStakeholder Relations Manager kwiKZN Inland Cricket Union.
“ENtumbane, oPhongolo, lezi zindawo zokudlala zifakwe ezikoleni ezimbili, eSinqeni Primary naseBonginhlanhla High School. Sikhethe izikole ezimbili kule ndawo ngoba ikhilikithi ikhula kakhulu khona ngenxa yothisha abazinikele abafana noSandile Lukhele noBongani Sibiya, bebambisene nomqeqeshi uMthobisi Nkosi.
“Le ndawo yasoPhongolo isikhiqize inqwaba yabadlali besilisa nabesifazane asebemele isifundazwe emazingeni ahlukene.”
Ezinye izindawo ezihlomulile ziseThekwini lapho kwakhiwe khona izindawo ezifanayo zokudlala eKhethamahle Primary School, KwaMashu, naseHalalisa Primary School eNtuzuma, zombili izikole nazo zathola izinsiza zokudlala ikhilikithi.
ABAFUNDI bezikole zaKwamashu naseNtuzuma, iKhethamahle Primary neHalalisa Primary School, nabo bagixabezwe ngezindawo zokudlala ikhilikithi nezinye izinsiza
Image: SITHUNYELWE