UHunt ufuna ukudunga umcimbi wePirates eMabhida

UMQEQESHI weDurban City, uGavin Hunt, ufuna ukubona ezakhe zikhipha amangwevu ekugobeni i-Orlando Pirates engazwile emdlalweni wanamuhla weBetway Premiership eMoses Mabhida Stadium, eThekwini. 

ICity izogadulisana nePirates engagayelwa mphako kulezi zinsuku, namuhla ngo-3.30 ntambama, okungumdlalo ongase ucacise ngethuba lePirates lokugudluza iMamelodi Sundowns esicongweni se-log yePremiership. 

EZimnyama ziza kulo mdlalo nje zithelwe ngezibonkolo njengoba emidlalweni eyisithupha  ezigcine ukuyidlala zinqobe emihlanu zadlala ngokulingana kowodwa, okubalwa nokuguqisa iChippa United ngo 2-0 ngoLwesithathu okwenze zalingana ngamaphuzu angu-25  neSundowns. 

ICitizens iza kulo mdlalo nje ibhala iyacisha njengoba emidlalweni emihlanu egcine ukuyidlala inqobe emibili yahlulwa kwemibili, yadlala ngokulingana kowodwa. 

Kanti futhi yiyona ephethe ukhiye ekuvimbeni eZimnyama ekuqhwakeleni esicongweni se-log namuhla. 

“Kuhlale kunzima ngaso sonke isikhathi ukubhekana neqembu elinabalandeli abaningi njengePirates.

Basefomini enhle njengamanje, futhi basiqinisile isikwati sabo kula masizini amabili edlule. Kodwa yize kunjalo sikulungele ukubhekana nayo.

Sidinga ukugxila ngokuphelele emdlalweni siqaphe eqolo njengonwabu. Ngiyazi ukuthi singakwazi ukukwenza lokho njengoba senzile kweminye imidlalo esiyidlalile, abadlali bami basadlale kahle selokhu kuqale le sizini,” kusho uHunt. 

ICitizens iguqiswe yiKaizer Chiefs ngo 1-0 kuyo le nkundla yaseMabhida ekupheleni kuka-Okthoba, okungumdlalo uHunt akholwa wukuthi kwaba yishwa ukuthi bahlulwe kuwona njengoba bangenelwa yigoli ngemizuzu yokugcina sebelwile. 

“Abadlali bami bayakwazi ukubaluleka kwalo mdlalo. Abanye babo sebeke bawudlala umdlalo walolu hlobo.

Ngakho okubalulekile wukubakhuthaza ukuthi bangene enkundleni ngokuzethemba, bangavumeli ukwenganywa wubukhulu bomdlalo, badlale ngokuzinikela ekulweleni ukunqoba.”

ICitizens okuyisizini yayo yokuqala le igijima kwiPremiership, isayiqale ngonyawo oluhle isizini njengoba ibalwa namaqembu ayisikhombisa aphezulu kwi-log yePremiership okuyinto ebingalindelekile eqenjini elingomakoti kulesi sigaba okuyimvama ukudonsa kanzima kwalo esigabeni esiphezulu lisuka kweseMotsepe Foundation Championship. 

Imidlalo yeBetway Premiership: 

Namuhla: 

Durban City v Orlando Pirates (Moses Mabhida Stadium, 3.30pm); Polokwane City v TS Galaxy (Old Peter Mokaba Stadium, 6pm); Siwelele FC v Chippa United (Dr Molemela Stadium, 6pm)

Kusasa: 

Marumo Gallants v Magesi FC (Dr Molemela Stadium, 3.30pm)