Kuzohlangana angasemsileni kowe-URC weSharks neConnacht
UMDLALI wamaBhokobhoko uGrant Williams ojoyine iqembu leHollywoodbets Sharks phesheya ngaphambi komdlalo wakusihlwa we-URC neConnacht.
Image: BACKPAGEPIX
I-United Rugby Championship ikhuza ibuya kule mpelasonto ngemuva kwekhefu lenyanga ngenxa yemidlalo yamazwe ngamazwe.
IHollywoodbets Sharks izobuya ngomdlalo wasekuhambeni ezowudlala neqembu lase-Ireland, iConnacht, ozoqala ngo-9.45 ebusuku eDexcom Stadium, eGalway.
La maqembu awahlezi endaweni enhle kwi-log kwazise iConnacht ikweka-12 ngamaphuzu ayisishiyagalolunye emidlalweni emine, kanti iSharks ikweka-13 ngamaphuzu ayisishiyagalombili emidlalweni emihlanu.
ISharks izoya kulo mdlalo ngaphandle kwenqwaba yabadlali abeseqenjini lamaBhokobhoko elizobhekana neWales, eCardiff, namuhla ntambama.
Kodwa-ke, ukubuya kukaGrant Williams kuliqinisile iqembu, kanjalo nokusayinisa umakadebona we-flyhalf obegijima kwiSuzuki Griquas uGeorge Whitehead.
Ukaputeni uVincent Tshituka uthe iSharks isebenzise ukulungisa amaphutha nokuqala kabusha ngemuva kokuyiqala kanzima isizini.
"Sikwazile ukuyilungiselela kahle le nselelo yokubhekana noConnacht. Abafana basebenze kanzima futhi kunomoya omuhle eqenjini,” kusho uTshituka.
“Asiyiqalanga isizini ngendlela ebesiyifuna kodwa konke kuzolungiswa ukusebenza kanzima nokuzimisela. Iqembu libambisene kahle emasontweni ambalwa adlule, enkundleni nangaphandle kwayo.
"IConnacht iyiqembu eliqinile ngakho-ke siyazi ukuthi ngeke kube lula ukuyinqoba, ikakhulukazi enkundeni yayo. Nabo bayawadinga amaphuzu futhi sazi kahle ukuthi sizobhekana nani."
ISharks isashoda nangenqwaba yabadlali abalimele okubalwa kubona u-Aphelele Fassi, Trevor Nyakane, Simphiwe Matanzima, Ruan Dreyer, Diego Appollis nabanye.
Iqembu leSharks elizodlala owe-URC neConnacht
Abazoqala: 15 Jordan Hendrikse, 14 Edwill van der Merwe, 13 Jurenzo Julius, 12 Francois Venter, 11 Makazole Mapimpi, 10 George Whitehead, 9 Jaden Hendrikse, 8 Emmanuel Tshituka, 7 Vincent Tshituka (ukaputeni), 6 Matt Romao, 5 Marvin Orie, 4 Jason Jenkins, 3 Hanro Jacobs, 2 Fez Mbatha, 1 Phatu Ganyane.
Abasebhentshini: 16 Eduan Swart, 17 Lee-Marvin Mazibuko, 18 Mawande Mdanda, 19 Emile van Heerden, 20 Phepsi Buthelezi, 21 Grant Williams, 22 Le Roux Malan, 23 Hakeem Kunene.