ICape Town City nezimpawu zokubuyisa isithunzi kwiChampionship

NGEMUVA kokuyiqala ngebatha isizini kwiMotsepe Foundation Championship, iCape Town City isiqalile ukukhombisa izimpawu zokuvuka emaqandeni njengoba isibuye namaphuzu aseyisusile esishozini okudlalela kuso izembe. 

Leli qembu likaJohn Comitis eligawulwe yizembe kwiBetway Premiership ngesizini edlule, emidlalweni emihlanu eligcine ukuyidlala likwazile ukubuya namaphuzu alisusile endaweni ka-15 kwi-log njengoba selisendaweni ka-10 kwi-log yeMotsepe Championship. 

ICity ephinde yakhombisa ukungasinisi mahleza ngezinhloso zayo zokubuyisa isithunzi, ivulele isibhaxu sika 4-0 kwiLerumo Lions ngoLwesithathu e-Athlone Stadium, eKapa.

Inenselelo yokuqhubeka nomgqigqo ngomdlalo wasekuhambeni ezowudlala ne-University of Pretoria eTuks Stadium, ePitoli, namuhla ngo-3.30 ntambama. 

Ekugawulweni kwayo yizembe kwiPremiership, iCity ilahlekelwe yinqwaba yabadlali bayo abamqoka okubalwa kubo uDarren Keet, Thabo Nodada, Haashim Domingo, Fortune Makaringe, nobengukaputeni uThamsanqa Mkhize.

Nokho leli qembu eliqeqeshwa uJan Vreman odabuka eNertherlands, lisayinise abadlali abanamava okubalwa kubo uKeagan Dolly, Njabulo Ngcobo, unozinti uMickey van der Hart osuka kwiHeerenveen yaseNertherlands, noWalter Bwalya osuka kwi-JS Kabylie yase-Algeria. 

Yize kumthathe isikhashana ukuhlanganisa leli qembu uVreman, kodwa seliyaqala ukukhombisa izimpawu zokuhlangana okubukeka kufike ngesikhathi esikahle sekusele imidlalo embalwa kuphele umzuliswano wokuqala wesizini, nokulinika ithuba lokubhukulela ukuphonsa inselelo embangweni wesicoco seligi yeChampionship. 

I-The Citizens ivuka emaqandeni nje kusemnyama kwamanye amaqembu aqale isizini edonsa kanzima, okubalwa kuwo iBaroka FC neMidlands Wanderers.

Phezu kwezinguquko ezenzile ikhomba indlela uDan Malesela, izintambo zathathwa uTlisane Motaung, kodwa iBaroka isadonsa kanzima namanje njengoba kuyiyona esahlezi emsileni we-log ngamaphuzu ayisishiyagalombili kuphela emidlalweni engu-12 esadlaliwe.

Ngesifanayo nakwiMidlands engomakoti kwiChampionship njengoba nayo isadonsa kanzima ngamaphuzu ayisishiyagalolunye emidlalweni engu-12, okuyibeka endaweni ka-15 kwi-log, nokuyindawo ebucayi ikakhulukazi njengoba sekusongwa umzuliswano wokuqala wesizini.

Leli qembu laseMgungundlovu eliqeqeshwa nguVincent “Masenti” Myeni linenselelo yokushintsha ukwenza ukugwema ukutholwa emathonsi abanzi.

Abafana Bebatha badlala neLeicesterford City namuhla ngo-3.30 ntambama eDobsonville Stadium, eSoweto. 

Imidlalo yeMotsepe Foundation Championship: 

Namuhla:

Gomora United v Highbury (TUT Stadium, 3.30pm); Leicesterford City v Midlands Wanderers (Dobsonville Stadium, 3.30pm); Baroka FC v Black Leopards (Global Stadium, 3.30pm); Venda FC v Kruger United (Thohoyandou Stadium, 3.30pm); The Bees v Casric Stars (Kanyamazane Stadium, 3.30pm); University of Pretoria v Cape Town City (Tuks Stadium, 3.30pm)

Kusasa: 

Upington City v Lerumo Lions (Mxolisi Dicky Jacobs Stadium, 3.30pm); Milford FC v Hungry Lions (Umhlathuze Sports Complex, 3.30pm); Upington City v Lerumo Lions (Mxolisi Dicky Jacobs Stadium, 3.30pm)