Owe-Orbit ufuna bavuke ngeStellies edonsa kanzima

UMDLALI wasesiswini kwi-Orbit College, uGiven “Manando” Thibedi, ubona kumqoka ukuvuka bazithathe balwele ukugcina umgqigqo ukuze baqede umzuliswano wokuqala wesizini besendaweni engcono kwi-log yeBetway Premiership. 

I-Orbit kuyiwe ekhefini leFifa isikhombisa ukuhlangana ngemuva kokuyiqala ngebatha isizini yokuqala kwiPremiership.

Emidlalweni emihlanu yakamuva, inqobe emithathu yahlulwa kwemibili. Ibhaxabulwe yiKaizer Chiefs ngo 4-1 kowokugcina ngaphambi kwekhefu leFifa.  

Izodlala neStellenbosch FC namuhla ngo-7.30 ebusuku e-Olympia Park, eRustenburg.

“Ukuthola umgqigqo emidlalweni yethu yakamuva esigcine ukuyidlala kusikhuthaze kakhulu,  kwenyusa nezinga lokuzethemba kithina badlali, ikakhulukazi abasebancane. Kusenze sabona ukuthi sesiyaqala ukuzinza kulesi sigaba sePremiership. 

Besivele sikulindele ukuthi sizoqala ngokudonsa kanzima emidlalweni yokuqala yesizini ngenxa yokuthi sinabadlali abaningi abaqalayo ukudlala kwiPremiership.  

Nokho, abadlali abanamava eqenjini abanjengoRama (Mphahlele) noMonnapule (Saleng) bayaluletha uzinzo futhi izimpawu zalokho seziyaqala ukubonakala kweminye imidlalo.

Umqeqeshi uPogiso (Makhoye) nethimba lakhe labaqeqeshi basalokhu beqhubeka besikhuthaza, besitshela ukuthi asingabhekisi amakhanda phansi, asiqhubeke silwe,” kusho uThibedi, owayedlalela iKaizer Chiefs kwiDStv Diski Challenge.  

“Ukushaywa kwethu yiChiefs ngaleya ndlela, kusivule amehlo njengakweminye imidlalo esisahlulwe kuyo kule sizini ngobuthaka esinabo nezindawo okusafanele silungise kuzona ukuze sizinze ngokwanele kulesi sigaba esingafani nhlobo nesibuya kuso seMotsepe Championship. 

Esikwenzayo manje wukuqinisa kulokhu esisakwenza kahle, bese silungisa amaphutha silwele nokugcina umgqigqo owodwa imidlalo ilandelana, hhayi ukuthi sizimisele kakhulu komunye umdlalo, komunye sithathe izinto kalula."

IMswenko Boys izobhekana neStellies esadonsa kanzima kule sizini njengoba emidlalweni engu-12 iqoqe amaphuzu ayisishiyagalolunye kuphela. Isendaweni ka-15 kwi-log.

“Ngeke kube lula ukubhekana neStellenbosch ngoba siyazi ukuthi ilwela ukusuka lapho ikhona kwi-log futhi siyazi ukuthi ukwenza kahle kwayo emdlalweni egcine ukuwudlala kwiConfed (Cup) izokuthatha njengesikhuthazi njengoba izodlala nathi. 

Ngeshwa nathi siyawadinga amaphuzu ngoba sifuna ukuba sendaweni engcono kwi-log ngaphambi kokuphela komzuliswano wokuqala wesizini.”