IPirates nenselelo yokuvala esikaMbokazi okhonjwa phesheya

UKUQINA kwezindaba ezimatanisa isiqongqwane se-Orlando Pirates, uMbekezeli “TLB” Mbokazi, neqembu lase-United States of America (USA) kungenzeka kuphoqe eZimnyama ukuthi zibuyele emakethe ziyothungatha isitobha esizovala isikhala phezu kokuba bekhona abayidlalayo indawo yaso.

Ngokuthola kweSolezwe, izingxoxo ziseqophelweni eliphezulu ngoMbokazi phakathi kweChicago Fire edlala kwiMajor League Soccer (MLS) nePirates ngokudayiselana okukhonjwa kwisamba esingaphezulu kuka-R50 million yize kungakavunyelwana ngokugcwele. 

Kuvela ukuthi iChicago ifuna kuthi kuqale i-Africa Cup of Nations (Afcon) eMorocco, ngenyanga ezayo, uMbokazi esesemabhukwini ayo yize isizini yeMLS iyoze ivule ngoFebhuwari.

Ukulimala kukaThabiso Sesane maphakathi nesizini edlule, kuvulele ithuba uMbokazi obesanda kukhushulelwa esikimini esikhulu sePirates esuka kweseDStv Diski Challenge. Lo mdlali waseHluhluwe, ufike wazinza ngokushesha odongeni lwasemuva, waphenduka esinye sezithenjwa. Ngaphandle kokulimala kukaSesane, leli qembu belivele lilinyalelwe ngomunye umdlali omqoka, u-Olisa Ndah, osekunesikhathi agcina ukubonakala enkundleni.

UXoki obeseluleme uphinde walimala kabi edolweni engozini yogwaqo ebithinta nomqeqeshi waleli qembu, u-Abdeslam Ouaddoum nowonozinti, uTyrone Damons, ekuqaleni kukaSepthemba. 

Yize kuke kwavela ukuthi uSesane useyaziqeqesha neqembu kodwa kuze kube yimanje akakabonakali ngisho ebhentshini kule sizini ka-2025/26. Lokhu kushiya iPirates noNkosinathi "Bhodlela" noLebone Seema abadlala maphakathi emuva. USeema udlale isikhathi eside noMbokazi ngesikhathi elimele uSibisi. Nokho emuva kokululama, ubuyile uSibisi wayibamba noMbokazi maphakathi emuva.

Ukungabuyi ekulimaleni kwabanye abadlali basemuva bePirates kuyibeka obala inkinga enyonyobela leli qembu ngokuhamba kukaMbokazi nakuba lizobe lihleka lodwa ngezigidi elizozithola. Kungenzeka eZimnyama zitheze eduzane njengoba sekunesikhathi kusabalele ukuthi zifuna isitobha seStellenbosch FC, uThabo Moloisane, esakhulela kwiMamelodi Sundowns. UMoloisane ubeqokelwe umklomelo womdlali wasemuva ovelele ngesizini edlule, iBetway Premiership Defender of The Season kodwa wakhala ngaphansi kuSibisi. Uma iPirates igcina ngokumthola, izobe ingaqali ukutheza kwiStellies kwazise yathenga ukaputeni wayo, uDeano Van Rooyen, ekuqaleni kwesizini edlule. Ekuqaleni kweka-2025/2026, isayinise uSihle Nduli oyibamba enkabeni yenkundla.

UMbokazi kulindeleke ukuthi adlale omunye wemidlalo yakhe okungenzeka kube ngeyokugcina edlubhe ijezi lePirates uma isibhekene neChippa United emdlalweni weBetway Premiership e-Orlando Stadium, eSoweto, namuhla ngo-7.30 ebusuku.

Imidlalo yeBetway Premiership:

Namuhla: Orlando Pirates v Chippa United (Orlando Stdium, 7.30pm)

Kusasa: Orbit College v Stellenbosch FC (Olympia Park, 7.30pm)

NgoLwesihlanu: Richards Bay v AmaZulu (Mhlathuze Sports Complex, 7.30pm)