UBavuma uchazwe ukudida i-India ngamasu ayo
UKAPUTENI wamaProteas, uTemba Bavuma, ejabula nozakwabo u-Aiden Markram noKyle Verreyne ngesikhathi benqoba i-India.
Image: BACKPAGEPIX
KUMGEZE igilo ukubona iqembu lakhe lishaya i-India ngamaqhinga ebicabanga ukuthi izonqoba ngawo emdlalweni wokuqala wochungechunge lweTest ngeSonto, ukaputeni wamaProteas, uTemba Bavuma.
AmaProteas aqinisekise ukuthi ngeke esanqotshwa kulolu chungechunge lwemidlalo emibili enqoba owokuvula obuse-Eden Gardens, e-Kolkata, ngama-run angu-30.
Iqembu lakuleli beliqala ukunqoba umdlalo weTest e-India kusukela ngo-2010 kanti belinqoba okokuqala kule nkundla kusukela ngo-1996.
AmaProteas awine ithosi akhetha ukubhetha kuqala, akhishwa wonke esathole ama-run angu-159. I-India yenze kangconywana kwi-innings yayo yokuqala njengoba iphume yonke isinama-run angu-189.
Iqembu lakuleli libe selihlanganisa ama-run angu-153 kwi-innings yalo yesibili, lisizwa nguBavuma oshaye angu-55 nokushiye i-India idinga ukushaya ama-run angu-124 kuphela ukuze inqobe umdlalo.
Nokho abashwibi bamaProteas, abebeholwa abe-spin uSimon Harmer noKeshav Maharaj, bakwazile ukuyikhipha yonke i-India isathole ama-run angu-93 kuphela.
"Ngicabanga ukuthi inkundla ebilungisiwe iyona abebeyicelile njengeqembu lasekhaya. Kusobala ukuthi size lapha sazi ukuthi inkundla izovuna abashwibi be-spin. Akuzange kusimangaze lokho kodwa-ke kuba nzima uma sekufanele ubhethe,” kusho uBavuma.
"Ngikholwa wukuthi abadlali bethu abasebancane bafunde lukhulu. Noma sinqobile sisadinga ukulungisa indlela esibhetha ngayo, siphinde siqinise indlela esishwiba ngayo ngesivinini. Sijabulile kodwa kufanele senze isiqiniseko sokuthi siba ngcono kakhulu emdlalweni wesibili."
Selokhu uBavuma aqala ukuhola leli qembu leTest ngaphansi komqeqeshi, uShukri Conrad, selinqobe imidlalo eyishumi, ladlala ngokulingana kanye kwengu-11 yeTest, okuhlanganisa nokunqoba owamanqamu we-ICC World Test Championship ngoJuni nonyaka.
UConrad uthe uyaziqhenya ngendlela iqembu eselikwazi ngayo ukulwa noma libhekene nezimo ezinzima.
"Siwine owamanqamu weWorld Test Championship kulo nyaka sibhekene ne-Australia eLord's kodwa ukunqoba lo mdlalo ngikubala nezinye zezinto ezinkulu esesizenzile. Ukuza e-India sidlale e-Eden Gardens bese senza into amaProteas ahlulekile ukuyenza emidlalweni engu-15, kusho lukhulu," ubeke kanje uConrad.
Umdlalo wesibili, okuzobe kungowokugcina, uzodlalelwa eBarsapara Stadium eGuwahati kusukela ngoMgqibelo.