AbamaBokke kwesomdlali ovelele emhlabeni

ABADLALI bamaBhokobhoko uPieter-Steph du Toit, Malcolm Marx, Ox Nche no-Ethan Hooker baqokelwe kuma-World Rugby Awards anonyaka.

IWorld Rugby ikhiphe uhlu lwabadlali lwabazobanga eminxeni eyahlukene ngoLwesibili ekuseni. Abazophumelela bazomenyezelwa ngoMgqibelo.

UDu Toit, Marx noNche bangene emunxeni weWorld Rugby Men’s 15s Player of The Year. Le ndondo bazoyibanga noLouis Bielle-Biarrey waseFrance. 

Uma uDu Toit ephinde eyithatha kuzobe kungokwesithathu kwazise wayithola okokuqala ngo-2019, wayiphinda nangonyaka odlule.

UMarx okwesibili eqokelwa le ndondo njengoba wayekhona kwababeyibanga ngo-2018.

UHooker uqokelwe eyeWorld Rugby Men’s 15s Breakthrough Player of the Year Award, yomdlali osemusha ogqame kakhulu kulo nyaka.

Uqhathwe noFabian Holland waseNew Zealand, uHenry Pollock wase-England noJoseph-Aukuso Suaalii wase-Australia.

"Ngithanda ukuhalalisela u-Pieter-Steph, uMalcolm, u-Ox kanye no-Ethan ngokuhlonishwa ngabadlali abahamba phambili emhlabeni," kusho umengameli we-SA Rugby uMark Alexander.

"Bonke benze kahle kakhulu kule sizini futhi bafanelwe ukuhlonishwa. Egameni le-SA Rugby nezwe lonke, ngithanda ukusho ukuthi siyaziqhenya ngabo.”

Ngosuku lo mcimbi iWorld Rugby izophinde imemezele iqembu elibunjwe ngabadlali abavelele emhlabeni kulo nyaka, iDream Team of the Year.