ISIMO senkundla siphoqe ukuthi iphakanyiswe ngamaqembu amabili indebe yePrince Mangosuthu Legacy Cup kulandela ukungadlalwa komdlalo wamanqamu obekumele udlale ngaMaZulu FC neNsingizini Hotspurs yaseSwatini ePrince Mangosuthu Regional Stadium, Olundi, ngeSonto.
Imvula eqale ngoMgqibelo kwaze kwaba yiSonto, iholele ekutheni konakale inkundla emuva kwemidlalo emibili eyandulela owamanqamu. Unompempe ugcine enqume ukuwumisa umdlalo.
AmaZulu afinyelele kowamanqamu ngokuguqisa iNjampela FC ngo 2-1 emdlalweni woukuqala owandulela owamanqamu, kwathi iNsingizini yashaya iRichards Bay FC ngo 6-5 sekukhahlelwa amaphenathi kwesibili. Ngenxa yokuthi awubange usadlalwa owamanqamu, abahleli bomqhudelwano banqume ukuthi indebe iqukulwe yiwona womabili amaqembu.
UMphathiswa wezeMidlalo, amaSiko namaCiko KwaZulu-Natal, uMntomuhle Khawula, uyena omemezele lezi zindaba.
“Womabili amaqembu, AmaZulu neNsingizini Hotspurs angompetha bePrince Mangosuthu Legacy Cup, siyawabongela la maqembu.
Sifisa ukubonga bonke abathandi bebhola basoLundi namaphethelo ngokuza ngobuningi babo ukuzokweseka le midlalo phezu kwemvula engaka,” kusho uKhawula.
Lo mqhudelwano waminyaka yonke wasungulwa ngo-2017 ngenhloso yokuhlonipha uMntwana uMangosuthu Buthelezi ongasekho. Bekuwunyaka wesibili udlalwa engasekho njengoba adlula emhlabeni ngo-2023.
Nyakenye unqotshwe yiNjampela FC edlala kwiSafa KwaZulu-Natal ABC Motsepe League.
IPrince Mangosuthu Legacyu Cup ibizinyaziswe yiNkosi yaKwaButhelezi, uMntwana uZuzifa Buthelezi, oyindodana kaMntwana uMangosuthu. Bekukhona neMeya kaMasipala wesiFunda iZululand, uMkhonyovu Khumalo nomengameli we-IFP, uVelenkosini Hlabisa
Related Topics: