UGlenrose uselobizela ukuphula irekhodi eValencia

ISIBABULI somgijimi wesifazane waseNingizimu Afrika, uGlenrose “The Supercharger” Xaba, sisha amashushu ngokusonga unyaka ngenothi eliphezulu njengoba sifuna ukwephula irekhodi laso emjahweni webanga lika-42km iValencia Marathon, eSpain, ngoDisemba 7.

UGlenrose (30) weBoxer Athletics Club uveze lokhu emcimbini wama-SPAR Women’s 10km Challenge Grand Prix Awards obubanjelwe eGoli ngoLwesibili ebusuku. Ukhale wemuka nesizumbulu sika-R500 000 ngokudla umhlanganiso kuyona yomihlanu imilenze yeSpar Women’s 10km Challenge kulo nyaka nokunqoba isicoco seGrand Prix. 

Le nsephe yomgijimi eyenze ezibukwayo emijahweni eyahlukene yamabanga ka-10km kulo nyaka, ihlabane ngo-R215 000 ngokuyiwina yomihlanu imijaho ka-10km ezifundazweni ezine. Ngaphezu kwalokho, ithole ibhonasi ka-R300 000 ngesicoco seGrand Prix esihlanganisa yonke imijaho yeSpar Women’s ngokuqoqa angu-120.

Abanye abagijimi abahlomulile kulo mcimbi wamaGrand Prix Awards, uDiniya Abaraya noSalam Gebre base-Ethiopia abalale isibili nesithathu, bahamba no-R100 000 no-R75 000 ngokwehlukana.

UKarabo Mailula olale isine kwiSpar Grand Prix uhlomule ngo-R50 000 no-R70 000 ngokwehlukana, kwathi uKarabo More olale isihlanu wahlomula ngo-R30 000 no-R50 000. 

“Unyaka wami uhambe kahle, ngokwezinhlelo ebenginazo. Ekuqaleni konyaka ngazitshela ukuthi ngifuna ukuvikela isicoco, ngakwenza lokho. 

Ngaphinda ngathola amaphuzu ngokuwina imijaho emihlanu. Kodwa phezu kwalokho ngisenomgomo omkhulu engisafuna ukuwufeza, okuwukwephula irekhodi laseNingizimu Afrika lika-42, eValencia. 

Uma ngikwazile ukufeza lokho, ngiyobe ngikwazile ukufeza konke ebengikuhlosile kulo nyaka,” kusho uGlenrose.

“Amalungiselelo ami okuyogijima iValencia asahamba kahle, angikhali ngalutho ngenxa yokwesekwa engikutholayo kusukela kuma-physio (ababhucungi), nomqeqeshi. 

Bonke benza isiqiniseko sokuthi sokuthi ngithola ukwesekwa engikudingayo ngokugcina umzimba wami uqatha, futhi ngisesimeni esikahle ngokomqondo ngoba ukulungiselela i-marathon akulula neze.”

Lo mgijimi odabuka eMbalenhle, eSecunda, oqeqeshwa yinsephe uCaster Semenya, uphethe irekhodi labesifazane lesikhathi sika-2:22:22 ebangeni lika-42.2km aliqophe nyakenye kwiCape Town Marathon.