UZwane ayimniki ukuphumula eyokulinyalelwa ngabadlali

UKULINYALELWA ngabadlali abamqoka ukubona njengenye yezinselelo eziphazamisa umgqigqo waleli qembu kule sizini yeBetway Premiership umqeqeshi waMaZulu, u-Arthur Zwane. 

UZwane uphoqelekile ukukhipha isitobha uKeegan Allan afake owasesiswini uBongani Zungu ngesikhathi bebhekene nePolokwane City emdlalweni abahlulwe kuwona ngo 1-0 yiPolokwane City ePrincess Magogo Stadium, KwaMashu, ngoLwesibili ebusuku. Ngaphezu kwalokho, kuMaZulu kulimele abadlali abamqoka okubalwa kubona uThabiso Kutumela no-Elmo Kambindu abangabagadli.

Usuthu ludlale nePolokwane lushayela phezulu kwazise luxebule iChippa United ngo 3-0 ngeSonto. 

“Iyakhathaza indlela esilahlekelwa ngayo ngabadlali, ikakhulukazi abawumgogodla weqembu. 

Uma ubheka nje, uBongani (Zungu) sigcine simphoqa ukuthi adlale yize besazi ukuthi akakakulungeli ukudlala umdlalo wonke ngenxa yokuthi ubesanda kubuya ekulimaleni. 

Kodwa ngenxa yokubona ukuthi sidinga umdlali onamava ozodlala emuva maphakathi nendawo, sabona kunesidingo sokuthi sidlalise yena ngenxa yokuthi bese silinyalelwe wuKeegan,” kusho uZwane.

“Silinyalelwe uTaariq (Fielies), salinyalelwa uKutumela (Thabiso), uKambindu (Elmo) naye akakalulami ngokwanele okuyingakho ebesebhentshini. 

UMashigo (Tebogo) usanda kubuya ekulimaleni, sisamphumuzile njengoKambindu, kanti uHlangabeza (Siyanda) udlala nehlombe osekuphele amasonto amabili limhlupha.

Kodwa kufanele siqhubeke sixhugele kunjalo, ngeke senze izaba ngoba kufanele siqhubeke silwe." 

Usuthu lusalelwe yimidlalo emithathu oluzoyidlala ngaphambi kwekhefu le-Africa Cup of Nations (Afcon).

Luzobuyela ensimini ngomdlalo wasekhaya elizowudlala neSiwelele FC ngoNovemba 22 eMoses Mabhida Stadium, eThekwini.

Luzovala unyaka ngowabakhaya elizowudlala neRichards Bay FC ngoNovemba 28 eMhlathuze Sports Complex, luvale ngeLamontville Golden Arrows ngoDisemba 3 eKing Zwelithini Stadium, eMlaza.