UMQEQESHI we-Orbit College, uPogiso Makhoye, unethemba lokuthi ifomu yesethenjwa, uMonnapule Saleng, ingaba wukhiye emdlalweni abazowudlala neKaizer Chiefs namuhla.
I-Orbit izogadulisana neChiefs koweBetway Premiership eFNB Stadium, eNasrec, namuhla ngo-7.30 ebusuku.
Izobhekana naMakhosi ishayela phezulu kulandela ukunqoba imidlalo emibili yakamuva yePremiership. Ngempelasonto edlule, ihlule iMagesi FC ngo 3-1 e-Olympia Park, eRustenburg.
Ukuhlangana kwezinto kwi-Orbit kuhambisana nokubuya kwefomu kaSaleng okhombisa ukubuyela ezingeni aziwa ngalo kwi-Orlando Pirates embolekise kuleli qembu laseNorth West.
USaleng ushaye igoli lokuqala bebhekene neMagesi, wakha elesibili elivalelwe phakathi nguThuso Moleleki naye osemabhukwini ePirates.
“Njenganoma yimuphi umqeqeshi, ukuthola ifomu kwabadlali bakho abamqoka eqenjini kuyinto eletha injabulo, ikuqinise idolo ngeminye imidlalo osuke usazoyidlala.
"Ngakho-ke ukuba sefomini kukaMonnapule kuyangijabulisa, kungenza ngiqine idolo ngemidlalo emine esisazoyidlala ngaphambi kwekhefu le-Afcon.
"Ifomu yakhe uyithole ngesikhathi esifanele lapho simdinga kakhulu, ikakhulukazi njengoba siya emdlalweni engiwuthatha njengonzima esiyowudlala neChiefs.
"Ngiyazi ukuthi akadlali yedwa, bakhona nabanye abenza kahle njengamanje kodwa ngiyamazi ukuthi uwuloluhlobo lomdlali olukwazi ukwenza izinto zenzeke ekunqobeni umdlalo walolu hlobo,” kusho uMakhoye, okholwa wukuthi uSaleng angaba ngukhiye emdlalweni wanamuhla.
“Ukuthola kwethu umgqigqo ngalesi sikhathi sesizini, ngikholwa wukuthi kufike ngesikhathi esikahle, okuyisikhathi noma yiliphi iqembu elisuke liwadinga ngaso amaphuzu sekubhekwe ekusongeni umzuliswano wokuqala wesizini.
"Indlela esidlala ngayo muva nje, iyakhombisa ukuthi iqembu lethu seliqalile ukuzinza kulesi sigaba seBetway Premiership, okuyisigaba esengingufakazi wakho ukuthi kunzima kangakanani ukuzinza kusona ngokushesha uma uyiqembu elisuka elisuka kwiMotsepe Championship.”
IMswenko Boys engomakoti kwiPremiership isendaweni ka-11 kwi-log yePremiership ngamaphuzu angu-13 emidlalweni engu-11.
Related Topics: