IChiefs nenselelo yokuqhubeka nomgqigqo weCaf eThekwini

UKUSHAYA into ecokeme kweKaizer Chiefs ibhaxabula i-AS Simba yaseDemocratic Republic of Congo (DRC) emdlalweni weCaf Confederation Cup ngempelasonto, akungatshazwa ukuthi kuyisikhuthazi ngaphambi komdlalo wayo weligi neDurban City eThekwini. 

IChiefs idlulele esigabeni samaqoqo kwiConfederation Cup ngokukhipha i-AS Simba ngo 3-1 sekuhlanganiswe imiphumela yomlenze wokuqala nowesibili. 

Kowokuqala iChiefs ibambane neSimba ngo 0-0 ekuhambeni eLubumbashi, ngaphambi kokuqedela umsebenzi kowomlenze wesibili eDobsonville Stadium, eSoweto, ngeSonto. 

Izodudulana neDurban City koweBetway Premiership ngoLwesihlanu ngo-7.30 ebusuku, eMoses Mabhida Stadium, eThekwini. 

Ngenxa yokungenzi kahle kwaMakhosi emidlalweni yawo yakamuva yePremiership, lo mdlalo azowudlala neCity yiwona okubhekwe ukuthi awusebenzisele ukubuyisa ithemba kubalandeli bawo abazwakalise ukungenami ngokulahla amaphuzu kwaleli qembu emidlalweni emine yakamuva. 

IChiefs idlale ngokulingana emidlalweni emithathu ilandelana, ibambana neMarumo Gallants ngo 0-0, AmaZulu FC ngo 1-1 neSiwelele ngo 0-0. 

AMakhosi aqale ngonyawo oluhle enqoba imidlalo emine kwemihlanu yokuqala. Nokho ukushayelwa ekhaya yiSekhukhune United ngo 3-1, kudalele umqeqeshi uNasreddine Nabi, amazinyo abushelelezi, wagcina ehlukene neqembu.  

Izintambo zithathwe uCedric Kaze noKhalil Ben Youssef abebengamaphini kaNabi abaqeqesha ngokubambisana.

Emidlalweni emithathu yakamuva yePremiership ngaphansi kwalaba baqeqeshi, Amakhosi adlale ngokulingana. Kule midlalo kubalwa noweCarling Knockout akhishwe kuwona yiStellenbosch FC kowe-Last 16.

Ngakho umphumela womdlalo wangoLwesihlanu phakathi kwaMakhosi neCitizens, yiwona obukeka uzocacisa ngendlela abalandeli abazizwa ngayo ngoKaze noKhalil Youssef abephenduke amaqhawe ekuqaleni kwesizini bebambele uNabi. Ngakolunye uhlangothi, iCity izobhekana neChiefs isazikhotha amanxeba kulandela ukukhishwa yiRichards Bay FC kwiCarling Knockout ngempelasonto edlule.