Umlando amaProteas esifazane engena kowamanqamu kweyoMhlaba
AMAPROTEAS esifazane ngesikhathi enqoba i-England kowandulela owamanqamu eNdebe yoMhlaba izolo.
Image: X / PROTEAS WOMEN
LIQOPHE umlando iqembu lesizwe lekhilikithi labesifazane linqoba i-England ngama-run angu-125 kowandulela owamanqamu eBarsapara Stadium, e-India, ngoLwesithathu ebusuku.
Nakuba amaProteas eseke afinyelela kowamanqamu kabili eNdebeni yoMhlaba yeT20, ayaqala ukwenza lokhu kweyemidlalo yama-over angu-50.
Emiqhudelwaneni emibili edlule yalolu hlobo lekhilikithi, ngo-2017 nango-2022, afika kweyandulela owamanqamu, akhishwa yi-England kuyona yomibili.
I-England iwine ithosi yakhetha ukushwiba kuqala. AmaProteas ahlanganise ama-run angu-319 eselahlekelwe amawikhethi ayisikhombisa.
Ukaputeni uLaura Wolvaardt wenze ezibukwayo eshaya ama-run angu-169 emabholeni angu-143.
I-England ohlulekile ukuthola ama-run angu-320 ebiwadinga ukuze inqobe njengoba ikhishwe yonke isashaye angu-194 kwi-over ka-43.
Kubashwibi bakuleli bekubhoke kakhulu uMarizanne Kapp othathe amawikhethi amahlanu.
Uphinde waqopha irekhodi elisha lamawikhethi amaningi emlandweni weNdebe yoMhlaba yemidlalo yama-One Day International njengoba esenamawikhethi angu-44 uma kuhlanganiswa yonke imiqhudelwano ayidlalile.
Bekungokwesibili la maqembu ehlangana eNdebeni yoMhlaba yanonyaka. Abhekana kowokuvula wamaqoqo i-Wngland eyawunqoba kalula ngamawikhethi amathathu ngo-Okthoba 3.
Ephawula ngemuva komdlalo uWolvaardt uthe uyaziqhenya ngokuba yiqembu lokuqala lakuleli lekhilikithi, kwabesifazane nabesilisa, ukungena kowamanqamu eNdebeni yoMhlaba yama-ODI.
“Senze into ekhethekile kakhulu. Ngicabanga ukuthi wonke umuntu ujabule kakhulu njengoba sishaywe yileli qembu kweyandulela owamanqamu emiqhudelwaneni emibili edlule. Kuyasithokozisa ukuthi sikwazile ukunqoba kulokhu,” kusho uWolvaardt.
"Kujabulisa kakhulu ukuthi sidlulele kowamanqamu kulolu hlobo lo mqhudelwano lapho nidlala khona nawo wonke amaqembu esigabeni samaqoqo. Ngicabanga ukuthi yindlela elungile yokwenza umqhudelwano. Sidlale ikhilikithi enhle kakhulu kule nyanga edlule futhi ngiyaziqhenya kakhulu ngeqembu ngokwenza kahle.
“Umdlalo wamanqamu uzoba nzima ngisho ngabe sizodlala ne-India engosokhaya noma i-Australia evikela isicoco. Sizojabula isikhashana bese siqala ukulungiselela owamanqamu.”
Iqembu lakuleli lizobhekana nelizonqoba kusasa phakathi kwe-Australia ne-India emdlalweni wamanqamu ozoba seNavi Mumbai, e-India, ngeSonto ngo-11.30 ekuseni.