OwoMvoti neqhinga lokugwema okubacekele phansi ngesizini edlule

UYAYIQONDA ingcindezi ababhekene nayo nakule sizini umqeqeshi woMvoti FC, u-Ayanda “Cobra” Dlamini, njengoba iMidlands Wanderers abebebanga nayo iligi ngesizini edlule isinyukele esigabeni seMotsepe Foundation Championship. 

Sekungumlando ukuthi uMvoti obubanga isicoco neMidlands kuStream A weSafa KwaZulu-Natal ABC Motsepe League, ukhale ngaphansi embangweni weligi ngamaphuzu amabili kuphela kuleli qembu laseMgungundlovu. IMidlands idle ubhedu kulesi stream, yahlula uMkhambathi FC ebingompetha bakaStream B kumaPlay-Offs esifundazwe, yamela iKwaZulu-Natal kuzwelonke. 

Nakule sizini uMvoti usayiqale ngonyawo oluhle le sizini ka-2025/26 njengoba uzihola phambili kwi-log ka-stream A ngamaphuzu angu-10 emidlalweni emine. Ulandelwa yi-Ulundi United neNjampela endaweni yesibili neyesithathu ngokwehlukana ngamaphuzu ayisikhombisa iqembu ngalinye. 

Umvoti uzobhekana neNjampela FC emdlalweni obhekwe ngabomvu namuhla ngo-3 ntambama eGreytown High Ground, eGreytown. 

“Kuyisiqalo esihle kithina ukuqala isizini ngale ndlela uma uqhathanisa nendlela esiqale ngayo ngesizini edlule.

Into esishayile kakhulu ngesizini edlule wukuthi sibuye ngomzuliswano wesibili wesizini, kwayima siqala ukuthola imiphumela amanye amaqembu ebesibanga nawo esewaqoqile amaphuzu.

Ngakho-ke kulokhu ngoba siqoqe amaphuzu kusaqalwa, lokho kuyasijabulisa kakhulu,” kusho uDlamini.

“Siyazi ukuthi abantu abaningi bazobheka thina kule sizini njengoba besibanga neMidlands, okwenza umthwalo wethu ube nzima.

Kodwa esigxile kukho wukubhekana nomdlalo ngamunye, sizame ukuqoqa amaphuzu.

Ukuhlala kwethu phezulu isizini iqala yikho okuzosinika umfutho emdlalweni ngamunye esizowudlala ngoba sizobe sazi ukuthi kukhona okufanele sikuvikele." 

Imidlalo yeSafa KZN ABC Motsepe League: 

Stream A: 

Namuhla:

Umzinto United v Asande FC (Scottburgh Country Club, 3pm); University of KZN v Ulundi United (Edgewood Campus 3pm); Tornando FC v Umlazi Young Lions (Siyabonga Sangweni Sports Complex, 1pm); Good Fellas v Durban Pioneers (Umzimkhulu Turf, 3pm); Umvoti FC v Njampela FC (Greytown High, 3pm) 

Kusasa:

Hellenic v Summerfield Dynamos (Mthunzini Soccer Field, 3pm)

Stream B: 

Namuhla:

KwaMashu Durban Knights v Ethekwini Coastal (John Dube High Ground, 3pm); Newcastle All Stars v Ditlou FC (Arbor Stadium, 3pm); Newcastle Warriors v Umshwathi United (Arbor Park, 12pm); Umgungundlovu United v Falcons FC (Wartburg Stadium, 12pm); FC Drakensberg v Chess FC (Wembezi Stadium, 3pm); Msinga United v Mkhambathi FC (Gxushaneni Stadium, 3pm)