OweBay ufuna bashintshe ukwenza kweyeligi

UMQEQESHI weRichards Bay FC, uRonnie Gabriel, unethemba lokuthi ifomu yaleli qembu emqhudelwaneni weCarling Knockout izodlulela emidlalweni yayo yeligi kwazise ayenzanga kahle  emidlalweni yakamuva yeBetway Premiership. 

IRichards izibekisele indawo kweyandulela owamanqamu eCarling Knockout ngokubhaxabula iDurban City ngo 3-1 kuma-quarterfinal kowabakhaya baKwaZulu-Natal eMhlathuze Sports Complex, ngoMgqibelo. 

IBay ifinyelele kuma-quarterfinal ngokunenebula iChippa United ngo 4-1 emzuliswaneni we-Last 16 okuyinkomba yokuba sefomini enhle kwaleli qembu kulo mqhudelwano womkhumulajezi. 

Leli qembu elizodudulana nePolokwane City ekuhambeni kowePremiership ngoMgibelo ngo-6 ntambama e-Old Peter Mokaba Stadium, ePolokwane, ifomu yalo yakamuva emidlalweni yeligi ayifani nelisayikhombise kwiCarling Knockout. Lisawine kathathu emidlalweni engu-10 yeligi elisayidlalile kule sizini.

Emidlalweni emibili yakamuva yePremiership, iNatal Rich Boyz ibhaxabulwe yiMamelodi Sundowns ngo 4-1, yashaywa yi-Orbit College ngo 1-0. 

“Singathanda ukuthola imiphumela efanayo emidlalweni yethu yeligi njengoba senza kahle kweyendebe yomkhumulajezi. Sikwazi ukunqoba imidlalo ngendlela efanayo nakwiligi, lokho kungaba yinto enhle eqenjini,” kusho uGabriel oqeqesha ngokubambisana noPapi Zothwane. 

“Emidlalweni esisayidlalile kule sizini (yeligi), sisakwazile ukwakha amathuba amaningi okushaya amagoli. Ngakho ngikholwa wukuthi uma singakwazi ukushaya amagoli nakweminye imidlalo elandelayo singakwazi ukunqoba imidlalo sithole amaphuzu.”

Ngaphambi kokushaywa emidlalweni emibili yakamuva yePremiership ihlulwa yiSundowns ne-Orbit, iNatal Rich Boys ibisiqalile ukukhombisa izimpawu zokuhlangana kwazise ishaya ngabadlali abasha abasafika esigabeni esikhokhelayo.