Kubhekwe iPirates nawaseKZN kuqhathwa aweCarling
UMDLALI we-Orlando Pirates, uSelaelo Rasebotja, ezakhe okubhekwe ngabomvu ngoLwesibili ebusuku ukuthi zizoqhathwa naliphi iqembu ezizodlala nalo kowandulela owamanqamu eCarling Knockout
Image: BACKPAGEPIX
AMEHLO azothi njo ekuqhathweni kwamaqembu amane azodudulana kweyandulela owamanqamu weCarling Knockout okuzokwenziwa ngemuva komdlalo wokugcina wama-quarterfinal ophakathi kweMarumo Gallants neStellenbosch FC ozodlalelwa eDr Molemela Stadium, eBloemfontein, ngoLwesithathu ngo-7 ebusuku.
Amaqembu azodlana imilala kweyandulela owamanqamu weCarling Knockout, azoqhathwa bukhoma kwiSupersport PSL PSL Channel 202 neSABC Sport ngoLwesithathu ebusuku ngemuva komdlalo weGallants neStellenbosch.
Mathathu amaqembu asedlulele emzuliswaneni wowandulela owamanqamu okuyiRichards Bay FC, Lamontville Golden Arrows ne-Orlando Pirates.
IPirates izibekisele indawo kweyandulela owamanqamu ngokushaya iMagesi FC ngo 2-1 ngoLwesibili e-Orlando Stadium, eSoweto.
Ukunqoba kwePirates bekusho ukubuyisa kwayo izinduku kwiMagesi okuyiyona eyabakhipha ekuseni kulo mqhudelwano ngesizini edliule, yahamba yaze yafinyelela kowamanqamu yagcina ngokuwunqoba ngokuguqisa iMamelodi Sundowns.
Ukuphuma ekuseni kweKaizer Chiefs neSundowns kowe-Last 16, sekwenze abalandeli abaningi bebhola baseMzansi babheka ngabomvu ukuthi eZimnyama zizohamba ibanga elingakanani kulo mqhudelwano, ikakhulukazi njengoba zisabhekene nenselelo yokuqeda ishobolo leminyaka kulo mqhudelwano elagcina ukuwunqoba ngo-2011 usabizwa ngeTelkom Knockout.
Ngakolunye uhlangothi, ukwedlulela kweyandulela owamanqamu kwamaqembu amabili aKwaZulu-Natal, Abafana Bes’thende neNatal Rich Boys, kuletha isasasa lokuthi ngabe elinye lawo kungenzeka yini liqhathwe neZimnyama.