OwamaProteas esifazane ufuna bagcine umgqigqo kweyoMhlaba
UMQEQESHI wamaProteas esifazane uMandla Mashimbyi.
Image: BACKPAGEPIX
AKALINDELE ukuthi iqembu lehlise izinga uma selibhekene ne-Australia emdlalweni wokugcina wamaqoqo eNdebeni yoMhlaba yama-One Day International (ODI) umqeqeshi uMandla Mashimbyi.
Lo mdlalo uzoba seHolkar Stadium e-Indore, e-India, ngoMgqibelo ngo-11.30 ekuseni.
Yize iNingizimu Afrika isivele izibekisele indawo kowandulela owamanqamu ngemuva kokunqoba imidlalo emihlanu ilandelana, uMashimbyi uthe iqembu lizimisele ukuqhubeka nomgqigqo walo, lingene kweyomkhumulajezi lizethemba.
Kowakamuva wamaqoqo ophazanyiswe yimvula izikhawu ezimbalwa ngoLwesibili, amaProteas aguqise iPakistan ngama-run angu-150.
Iqembu lakuleli libhethe kuqala lahlanganisa ama-run angu-312 sekuphume abadlali abayisishiyagalolunye. Abagqame kakhulu kube ngukaputeni uLaura Wolvaardt oshaye angu-90 noMarizanne Kapp oshaye angu-68.
IPakistan ibe isinqunyelwa ukuthi ishaye ama-run angu-234 kuma-over angu-20, yangalibona elidlalayo njengoba igcine ihlanganise angu-83 kuphela sekuphume abadlali abayisikhombisa.
Ukunqoba lo mdlalo kusize amaProteas ahlanganisa amaphuzu angu-10 emidlalweni eyisithupha.
“Ngicabanga ukuthi kubalulekile ukuthi sizame ukuqonda ukuthi sifuna ukusisonga kanjani isigaba samaqoqo ngoba lokho kungasinika umfutho odingekayo ukuze singene namandla esigabeni esilandelayo,” kusho uMashimbyi.
“Siyazi ukuthi isigaba somkhumulajezi sifana nokugembula, kungenzeka noma yini kodwa uma ningena nomfutho nokuzethemba niba nethuba elingcono kunamanye amaqembu.”
UMashimbyi uthe uyaziqhenya ngendlela iqembu lakhe elavuka ngayo ngemuva ngokubhubhudlwa yi-England ngamawikhethi angu-10 emdlalweni wokuvula lapho lakhishwa khona lonke lisashaye ama-run angu-69 kuphela.
"Okwakumqoka ngemuva kwalowo mdlalo wokuqala wukuthi sibhekana kanjani nokuhlulwa ngaleya ndlela. Ngingasho ukuthi besiwudinga umphumela onjeya ukuze siqonde ukuthi yini okufanele siyenze,” uqhube kanje.
“Sesinabadlali abahlukene abagqama ezikhathini ezahlukene zomdlalo. Yilokho okwenza abadlali bathembane, babambisane. Bayazi ukuthi uma kukhona ongadlalanga kahle omunye uzongena asize iqembu. Siyazi ukuthi usemningi umsebenzi esidinga ukuwenza ukuze iqembu liqhubeke nokuthuthuka."