IBaroka 'isimise' uMalesela ngokugqoza kwemiphumela
UMQEQESHI weBaroka FC, uDan Malesela, osemiswe isigubhukane kuleli qembu kulandela ukuphikwa kwalo yimiphumela kusukela kuqale le sizini kwiMotsepe Foundation Championship
Image: BACKPAEPIX
UKUPHIKWA yimiphumela kweBaroka FC edlala kwiMotsepe Foundation Championship, sekuholele ekumisweni isigubhukane komqeqeshi wayo, uDan “Dance” Malesela, nephini lakhe, uJoel Masutha.
Kuvela ukuthi uMalesela nethimba lakhe labaqeqeshi banikwe izincwadi zokumiswa izolo ngemuva komhlangano ophuthumayo nabaphathi beqembu obungeSonto kulandela ukwehlulwa ekhaya kwaleli qembu ngo 2-0 yi-University of Pretoria, eMafori Mphahlele Stadium, eGa-Mphahlele, ngoMgqibelo.
Nakuba kuvela eyokumiswa kukaMalesela kodwa kubukeka selimshonele lo mqeqeshi kuleli qembu alijoyine maphakathi nesizini edlule livika izembe, walenyusela endaweni yesishiyagalombili.
Uma egcina ngokukhonjwa indlela kwiBaroka, uMalesela kuzobe sekungokwesibili limxosha kwazise nangesizini ka-2023/24 kwenzeka esifanayo emiswa, lagcina ibhantshi ligcwale umoya.
Leli qembu eliphethwe uKhurishi Mphahlele, ngaphambi kokuqala kwesizini lisayinise abadlali abanamava okubalwa kubona unozinti uBadri Ali Sangare esuka kwiSekhukhune United, uThato Mokeke wodumo kwiSupersport United neCape Town City, uTebogo Langerman wodumo kwiMamelodi Sundowns, noKabelo Kgositsile obolekwe kwi-Orlando Pirates.
Nokho, phezu kwalokho lidonsa kanzima njengoba seliphenduke ukudla kwenduku.
IBaroka isishaywe imidlalo emihlanu kweyisikhombisa esadlaliwe, yanqoba owodwa, yadlala ngokulingana komunye. Isendaweni ka-15 kwi-log yeChampionship okuhlezi emsileni kuyona iMidlands Wanderers.
UMalesela ujoyine iBaroka ngemuva kokukhonjwa indlela yiMarumo Gallants ngoFebhuwari nonyaka. Nakhona iqembu liphikwe yimiphumela lagcina litakulwe ngu-Abdeslam Ouaddou oseqeqesha i-Orlando Pirates.
IBakgakga izobuyela enkundleni ngokubhekana ne-Upington City ngo-Okthoba 28, eMxolisi Dicky Jacobs Stadium, e-Upington.