Umqansa kwiPirates inenebulwa koweCaf eDRC

Saint Eloi Lupopo (1) 3

Orlando Pirates (0) 0

I-ORLANDO Pirates izebeke engcupheni yokuphuma ekuseni emqhudelwanei weCaf Champions League inenebulwa ngo 3-0 yiSaint Eloi Lupop yaseDemocratic Republic of Congo (DRC) emdlalweni womlenze wokuqala wokuhlungela ukungena esigabeni samaqoqo kwiCaf Champions League eStade Frederick Kibassa Maliba, eLubumbashi, izolo ntambama. 

Lo mphumela ubeke iPirates engozini yokuphuma zibekwa kwiChampions League ekubeni ngesizini edlule ihlulwe kowandulela owamanqamu yiPyramuds FC yase-Egypt, egcine iqede ngeMamelodi Sundowns kowamanqamu. 

IPirates ifinyelele kulesi sigaba emuva kokuzigwazela ibhece kwiLioli FC yaseLesotho emzuliswaneni wokuqala wokuhlunga inqoba ngo 7-0 uma sekuhlanganiswe imidlalo yemilenze yomibili. Nokho ukuhlulwa kwayo ngale ndlela eDRC akubuzwa ukuthi kuzoyifakela ingcindezi kowomlenze wesibili njengoba sekufanele ishaye amagoli amane ukuze izodlulela esigabeni samaqoqo. 

Ngaphandle kwalokho, eZimnyama okuyilona qembu lokuqala lase-Afrika eseNingizimu elazuza isicoco seChampions League ngo-1995, liya kulo mqhudelwano nje amehlo athe njo kumqeqeshi wayo, u-Abdeslam Ouadddou, othathe izintambo kuJose Riveiro obesephunduke intandokazi neqhawe kubalandeli baleli qembu ngokulinqobela izicoco. 

Nakuba u-Ouaddou waseMorocco eseqalile ukukhombisa izimpawu zobunkunzi kuleli qembu laseSoweto abingelele kulo ngesicoco seMTN8 ekuqaleni kwale sizini kodwa kuyinto eyaziwayo ukuthi okulindelwe kakhulu kuyena wukwenza kangcono kunoRiveiro kwiChampions League esihlule abaqeqeshi abaningi kweZimnyama. 

Emdlalweni womlenze wesibili, iPirates izobhekana neLupopo ngoMgqibelo, e-Orlando Stadium, eSoweto. 

Khonamanjalo: IMamelodi Sundowns inqobe iRemo Stars yaseNigeria ngo /////////////////emdlalweni womlenze wokuqala wokuhlungela isigaba samaqoqo seChampions League eM.K.O Abiola International Stadium, eNigeria. Umdlalo womlenze wesibili uzoba seLoftus Versfeld Stadium, ePitoli, ngeSonto ntambama. Komunye umdlalo weCaf, iStellenbosch idlale ngokulingana ngo 0-0 ne-15 de Agosto yase-Angola, koweConfederation Cup kowomlenze wokuqala ekuhambeni ngoMgqibelo. Owomlenze wesibili uzoba se-Athlone Stadium eKapa, ngoMgqibelo. Kwenzeke okufanayo kwiKaizer Chiefs ebambane ngo 0-0 neSimba yaseDRC ekuhambeni. Umdlalo womlenze wesibili uzoba seDobsonville Stadium eSoweto, ngoMgqibelo ntambama.