UMabuya ulobizela ukubona iBay 'igqilaza' eMhlathuze

UMDLALI wasemuva kwiRichards Bay FC, uLwandile Mabuya, ukuthatha njengesibusiso ukubuyela enkundleni yabo yasekhaya abazimisele ukuyisebenzisa njengendawo yokuthwalisa kanzima amaqembu ayizihambi phambi kwabalandeli  babo.

UMabuya (25) ongomunye wabadlali abayizinsika kuleli qembu, ukubadlali elithembele kubona ekwenzeni izinto zenzeke kule sizini njengoba libuyele ezimpandeni ngemuva kwamasizini amathathu lidlalela eThekwini. 

IBay okuyiwe ekhefini leFifa isemgqigqweni omuhle, izobhekana ne-Orbit College emdlalweni weBetway Premiership  eMhlathuze Sports Complex, eRichards Bay, namuhla ngo-7.30 ebusuku. 

Nakuba iguqiswe yiMamelodi Sundowns ngo 4-1 emdlalweni wePremiership kodwa ivuke yazithatha yehlula iChippa United koweCarling Knockout Cup Last 16.

INatal Rich Boys isebenzise iKing Zwelithini Stadium, eseMlazi, eThekwini, njengenkundla yayo yasekhaya kusukela maphakathi nesizini ka-2021/22 okuyisizini enqobe ngayo isicoco seMotsepe Foundation Championship yakhushulelwa kwiBetway Premiership, yadlala amasizini amathathu kulesi gaba kule nkundla yaseMlazi ngenkathi kusalungiswa uMhlathuze. 

Ibuyele eMhlathuze kule sizini, yadlala umdlalo wayo wokuqala kule nkundla ngomdlalo wayo wasekhaya ne-TS Galaxy. Ayikahlulwa emidlalweni emithathu esayidlalele kule nkundla, esanqobe kuyo emibili yadlala ngokulingana kowodwa, okubalwa noweCarling Knockout ibhaxabula iChippa ngo 4-1. 

“Ngicabanga ukuthi kuyisibusiso kithina ukusebenzisa inkundla yethu yasekhaya ngemuva kwesikhathi sidlalela enkundleni ekude nabalandeli bethu. Abantu baseRichards Bay nabalandeli bethu kudala belangazelele ukubuka iqembu labo enkundleni yalo yasekhaya. 

Kufanele nakanjani sikusebenzise ukudlalela kwethu ekhaya phambi kwabalandeli abaphuma ngobuningi ukuzoseseka, sikwenze kube nzima emaqenjini esidlala nawo ukubhekana nathi uma sidlalela ekhaya,” kusho uMabuya. 

UMabuya odabuka eMbalenhle, eSecunda, eMpumalanga, yisizini yakhe yesithupha lena egijima kwiRich Boys ayijoyine ngesizini ka-2020/21 esuka kwiRemember Elite Sports Academy, wanqoba nayo isicoco seMotsepe Championship. 

“Sidinga ukugcina umgqigqo wethu, ngoba inhloso yethu wukuthi siye ekhefini likaDisemba siku-Top 8, sizehlisele umthwalo ngoba iyashisa insimbi ngomzuliswano wesibili wesizini.”