UMpangase udalula izinhloso zoMsinga ngesicoco seligi yeMotsepe

OYIPHINI lomqeqeshi kuMsinga United, uPhelelani “JJ” Mpangase, usephumele obala ngezinhloso zeqembu kule sizini ka-2025/26 yeSafa KwaZulu-Natal ABC Motsepe League abasadlale imidlalo emithathu kuyona. 

UMsinga odlale ngokulingana ngo 1-1 neDitlou FC eGxushaneni Soccer Field, eMsinga, ngoMgqibelo, usunqobe imidlalo emibili, wadlala ngokulingana kowodwa kuStream B weKZN Motsepe League. 

Leli qembu lisendaweni yesibili kwi-log ngamaphuzu ayisikhombisa. Libambene noMkhambathi FC osendaweni yokuqala, neChess FC esendaweni yesithathu.

KuStream A uMvoti FC yiwona osazihola phambili ngamaphuzu ayisikhombisa, ulandelwe yiGood Fellas ngamaphuzu ayisithupha ne-Asande FC kweyesithathu ngamaphuzu alinganayo. 

“Ekujoyineni kwami leli qembu ngoNovemba ngiqala ukusebenza nomqeqeshi uSmart Ndlovu (oyinhloko), sifike sasebenzela ukubuyisa uzinzo ngabadlali abasebancane esinabo eqenjini nabambalwa abanamava kodwa sakwazi ukuqeda endaweni yesibili ngemuva koMkhambathi odlale amaPlay-Offs (esifundazwe), yize besingenazo izinhloso zokulwela iligi ngoba besisakha iqembu. 

Kodwa ngenxa yokukhombisa ukuhlangana kwalesi sikwati esesihlanganisile salaba badlali abasebancane nabanamava, kule sizini sizibophezele ekulweleni isicoco seligi. 

Njengoba kule midlalo esisayidlalile sikwazile ukuthola amaphuzu, sizoqhubeka nokuthatha umdlalo ngamunye, singazifakeli ingcindezi ngokuthi ezinye izimbangi zethu zenzani,” kusho uMpangase owazakhela igama esadlala emaqenjini okubalwa kuwo iMamelodi Sundowns nePlatinum Stars. 

Ngesizini ka-2022/23 uMsinga owawumele iKwaZulu-Natal kumaPlay-Offs kazwelonke e-ABC Motsepe League ayedlalelwa eMgungundlovu, wakhala ngaphansi kule midlalo yokuhlungela ukukhuphukela kwiMotsepe Foundation Championship. Kwagcina kuphumelele i-Upington City yaseNorthern Cape ne-Orbit College yaseNorth West.

“Abadlali okukhoba kubona uNduduzo Mthembu, Ntokozo “Bayano” Nkosi, Ayanda “Ntshebe” Dlamini noNkululeko Miya, babambe iqhaza elikhulu ekuqiniseni ukhakhayi lwabadlali esinabo kuleli qembu,” kuqhuba uMpangase osebenzisana noButi “Scara” Gatebe njengephini lesibili ethimbeni labaqeqeshi.

UMsinga uzobuyela ensimini ngomdlalo wasekuhambeni neFalcons FC, eSaccharine Field, ePhoenix, ngoMgqibelo ngo-3 ntambama. 

Imiphumela yeSafa KZN ABC Motsepe League:

Ku-Stream A: 

Summerfield Dynamos 1-1 Durban Pioneers; Njampela FC 1-0 Umlazi Young Lions; Umvoti FC 0-0 Ulundi United; Hellenic 0-1 Asande FC; Good Fellas 3-0 University of KwaZulu-Natal FC; Umzinto United 0-0 Tornado FC

Ku-Stream B: 

Chess FC 1-1 Falcons; Mkhambathi FC 0-0 Umshwathi United; Msinga United 1-1 Ditlou FC; Drakensberg FC 0-1 Ethekwini Coastal; Umgungundlovu United 3-1 Newcastle All Stars; KwaMashu Durban Knights 0-0 Newcastle Warriors