OwePolokwane ubonga iTLB yePirates ngokufika kwiPSL

UMDLALI wasesiswini kwiPolokwane City, uBanele “Sgora” Mnguni, ubalula ukukhuthazwa  nguMbekezeli “TLB” Mbokazi we-Orlando Pirates njengokumqinise idolo eseqala ukulahla ithemba ngokudlala ibhola esigabeni esikhokhelayo. 

UMnguni (21) okhushulelwe esikimini esikhulu sePolokwane ngaphambi kokuqala kwale sizini kweseDStv Diski Challenge, ucijwe esikhungweni sezemidlalo iLangalibalele Sports Academy esiseManzimtoti, eThekwini, okudlule kuso uMbokazi ngaphambi kokubonwa yiPirates.

Lo mdlali odabuka eNkuthu, eMnambithi, oyibamba esiswini, usaqale imidlalo emihlanu kuyo yonke imiqhudelwano, waba ngumvusi wenyamazane emagolini amabili.

“Yize uMbekezeli afika kamuva kunami eLangalibalele Academy kodwa ezakhe izinto zashesha zamlumngela, wasayiniswa yiPirates mina ngasala esikhungweni izinto zami zingahlangani. 

"Kodwa ngamfisela okuhle ngenhliziyo yami yonke, ngiya nasemidlalweni yePirates yeDiski Challenge uma bedlala eThekwini, ngenxa yokuthi bengisamthatha njengozakwethu engidlale naye. Naye futhi waqhubeka nokungeseka engiqinisa idolo engitshela ukuthi angingalahli ithemba, izinto zizolunga,” kusho uMnguni, owajoyina isikhungo iLangalibalele ngo-2022, ngemuva kokuphothula u-matric. 

“Umqeqeshi nomqondisi weLangalibalele, uWonder Mnguni, obambe elikhulu iqhaza ekupholisheni ikhono lami, wangiyisa emaqenjini ehlukene iMaritzburg United (esiyiDurban City) neGolden Arrows ukuyozama inhlanhla kodwa kwangalunga.

"Ngenxa yokushaywa kwami yiminyaka ngenxa yemigomo yesikhungo engabavumeli abadlali abangaphezulu kweminyaka engu-20 ubudala, ngabe sengiphoqeleka ukuthi ngisishiye ngibuyele ekhaya eMnambithi.

"Ngabuyela emakhaya ngadlalela iqembu elidlala kwiHollywoodbets Regional League, iPieters Fast Eleven, sengiqalile ukulahla ithemba ngokudlala kwiPSL, nakhona lapho bengilokhu ngixhumana naye uMbekezeli ngocingo, engiqinisa idolo ethi angingalahli ithemba.

"Kodwa kwathi ngingazelele ngoJulayi, ngonyaka odlule, ngafonelwa ngumqeqeshi uWonder (Mnguni) engitshela ukuthi usengihlelele ukuyozama inhlanhla kwiPolokwane City, nokuyilapho-ke engithole khona ithuba lokudlala eqenjini leDiski Challenge, njengoba kule sizini ngibe sengikhushulelwa esikimini esikhulu sePremiership."

IPolokwane okuyiwe ekhefini leFifa isefomini enhle emidlalweni yeBetway Premiership, izobuyela ensimini ngomdlalo wasekuhambeni ne-Orlando Pirates ngo-Okthoba 22, e-Orlando Stadium, eSoweto.