Kwenyuswe imiklomelo yomjaho iComrades Marathon
IZICUKUTHWANE kwethulwa iComrades Marathon okubalwa kuzo amalungu ebhodi ye-CMA kusukela kwesokunxele u-Alan Gray, Willie Mtolo, Barry Holland, uNontuthuko Mashimane, u-Alain Dalais, uMqondisi Ngcobo, u-Isaac Ngwenya, umgijimi uTete Dijana, uSurge Forge, iphini leMeya yoMasipala uMsunduzi uMxolisi Mkhize, noBrenda Marolen
Image: COMRADES MARATHON ASSOCIATION
IGCAGCELE esokeni kubagijimi iComrades Marathon Association (CMA) imemezela ukwenyuswa kwemiklomelo ezohlonyulwa ngabazokwenza kahle emjahweni iComrades Marathon wangonyaka ozayo ozogijinywa kwenyukwa kusukwa eThekwini kubhekwe eMgugungundlovu ngoJuni 14 ka-2026.
Lokhu kudalulwe ngabe-CMA ngoLwesithathu eComrades Marathon House, eMgungundlovu.
Lo mjaho webanga elide ozobe uhlanganisa iminyaka engu-99 wasungulwa, uqukethe isizumbulu sika-R8.19 million, okusho ukwenyuka ngo-10% emihlomulweni yanonyaka.
Umgijimi ozodla umhlanganiso kwiComrades yangonyaka ozayo uzogoduka no-R925 000. Lena yimali engaphezulu kwehlonyulwe nguTete Dijana noGerda Steyn engu-R875 000 abadle umhlanganiso ngokwehlukana kwiComrades yanonyaka kusukwa eMgungundlovu kubhekwe eThekwini.
Le miklomelo ibala nebhonasi ka-R605 000 kwabesilisa nabesifazane ezotholwa ngabagijimi abazophula irekhodi lo mjaho owenyukayo wangonyaka ozayo, nomunye u-R550 000 ozohlonyulwa ngumgijimi ozophula irekhodi labesilisa lika-Leonid Shvestov waseRussia lesikhathi esingu-5:24:49 aliqopha ngo-2008, nelabesifazane lesikhathi esingu-5:49:46 likaGerda Steyn aliqophe nyakenye.
Lezi zindaba zifane noju kubagijimi abaningi abaziphilisa ngokugijima.
Isiqubulo seComrades yangonyaka ozayo sithi “Ska Fela Moya”, okuyigama lesiTswana elisho ukuthi Ungalahli Ithemba.
“IComrades Marathon yangonyaka ozayo ibukeka izoba ngesezingeni eliphezulu kakhulu.
Ukwethulwa kwalo mjaho kuseyisiqalo nje sezinto ezinkulu njengoba sivivela lo mjaho ozobe ugijinywa kwenyukwa ezinyangeni ezisishiyagalombili kusukela manje,” kusho uMqondisi Ngcobo ongusihlalo we-CMA.
“I-CMA izibophezele ekuqinisekiseni ukuphepha nentokozo kwabo bonke abazobe bebambe iqhaza kulo mjaho.”
Indlela yokungenela umjaho ayishintshanga njengoba nemali yokuwungenela isafana neyango-2023, 2024 no-2025. Imingenelo yokuqala ebekelwe abagijimi asebegijime iComrades amahlandla ayishumi nangaphezulu (Green Number Club) izoqala ngo-Okthoba 27. Eyesibili eqondene nabasagijime imijaho engaphansi kweyishumi izoqale ngoNovemba 3. Yonke imingenelo izovalwa ngoNovemba 26 uma isibalo sesifinyelele kubagijimi abangu-22 000.
Imininingwane ethe xaxa yokungenela umjaho itholakala kwi-website yeComrades Marathon, ethi: www.comrades.com.
Khonamanjalo, kube sekuhlonishwa noCherlyl Winn odlule emhlabeni ezinsukwini ezintathu ezedlule.
UWinn owanqoba umjaho weComrades kwabesifazane ngo-1982, ubeyilunga lebhodi yeCMA isikhathi eside, waba ngusihlalo wayo kusukela ngo-2017 kuya ku-2021.