UGrobler ethubeni lokuphula elinye irekhodi likaNomvethe kwiPSL
UMGADLI weSekhukhune United, uBradley Grobler nozakwabo, bejabulela elinye lamagoli akhe kwiBabina Noko
Image: BACKPAGEPIX
IFOMU ekhonjiswa ngumgadli weSekhukhune United, uBradley Grobler, kusukela kuqale isizini yeBetway Premiership ikhomba ukuthi akusensuku zatshwala aliphule irekhodi lamagoli emidlalweni yeligi eliphethwe nguSiyabonga "Bhele" Nomvethe.
Kusukela kwasungulwa iPremier Soccer League (PSL) ngo-1996, uNomvethe owabeka amakhokho ethala, uhamba yedwa ngokuhlohlwa kwamagoli eligi ngawu-105.
Amabili ashaywe nguGrobler ngesikhathi iSekhukhune inenebula iKaizer Chiefs ngo 3-1 ngoLwesibili, ambeke ezithendeni zikaNomvethe ngawu-102.
UNomvethe usanda kugudluzwa nguPeter Shalulile weMamelodi Sundowns eqhulwini ngokushaya angu-130 kuyona yonke imiqhudelwano. UShalulile waseNamibia usendaweni yesithathu kwashaywe emidlalweni yeligi ngemuva kukaNomvethe noGrobler, ngawu-91.
UGrobler owagoduka neLesley Manyathela Golden Boot ngamagoli angu-16 eligi awashayela iSuperSport United ngo-2020/2021, useyibhakuzise amahlandla amane inethi emidlalweni eyisithupha yeligi kusukela ejoyine iBabina Noko ekuqaleni kwesizini.
Nguyena lo mgadli ozihola phambili emjahweni wamagoli kwiligi ngamagoli amane. Ulandelwa ngu-Iqraam Rayners, Puso Dithejane we-TS Galaxy, Junior Dion weLamontville Golden Arrows noSaluleko Mahlambi weGalaxy ngamathathu umdlali emunye.
UGrobler osephendule iChiefs ithofi lakhe eminyakeni edlule, ugcine elihlanzile iqiniso ngokumenza kube sengathi uthelwe ngezibonkolo njalo uma ebhekene naleli qembu laseNaturena.
Kusukela afika ebholeni elikhokhelayo uGrobler akayizwa iChiefs uma ebhekene nayo ngokwahlukana kwamaqembu asewadlalelile kule minyaka engu-19 aseyigijime esigabeni esikhulu sePremier Soccer League (PSL).
Ayisishiyagalolunye amagoli eligi (12 sekuhlanganiswe yonke imiqhudelwano) aseshaywe nguGrobler uma ebhekene neChiefs kusukela ngo-2008.
Ngemuva kokuqokwa njengomdlali wosuku ngoLwesibili, uGrobler ubuzwe ngembangela yokuhlala esefomini njalo uma ebhekene neChiefs.
“Ngeke ngikhulume iphutha kodwa kwehla kahle kakhulu ukushaya amagoli ubhekene nelinye lamaqembu elathola ithuba lokukusayinisa eminyakeni edlule laliyeka ngoba likhala ngokuthi usumdala ngokweminyaka,” kusho uGrobler kwiSuperSport.
Eminyakeni edlule, ngesikhathi uGrobler ewaqhulula kwiSuperSport, wake wamataniswa neChiefs kodwa leli qembu lawachitha lawo mahlebezi likhomba iminyaka yalo mgadli nokuthi useshiywe yisikhathi ebholeni elikhokhelayo.