UMabasa uyilungele ingcindezi yowamanqamu weMTN8

UMGADLI we-Orlando Pirates, uTshegofatso Mabasa, uthi iqembu lakhe liyejwayele ingcindezi yemidlalo emikhulu ngakho kubona sezigawulwe zabekwa ngokuyolwela indebe yesine yeMTN8 njengoba bezotholana phezulu neStellenbosch FC kowamanqamu kusasa ngo-6 ntambama, eMbobmela Stadium, eNelspruit. 

Yize uMabasa engakadlali midlalo etheni kwiPirates kule sizini ngaphansi komqeqeshi, u-Abdeslam Ouaddou, kodwa usha amashushu ngokukhipha amangwevu kulo mdlalo wamanqamu wakusasa njengoba yena nozakwabo bemagange ngokuvikela le ndebe asebeyinqobe amahlandla amathathu elandelana. 

Lo mgadli oqatha noliboniswayo ipali, usadlale imidlalo emine kuphela kweyisishiyagalombili edlalwe yiPirates kule sizini, okubalwa owodwa weMTN8 awudlalile beguqisa iMamelodi Sundowns kumaphenathi kowomlenze wesibili wowandulela owamanqamu, nemithathu yePremiership okubalwa kuyo emibili ayiqale ebhentshini. 

Nokho lo mgadli oseshayele eZimnyama amagoli angu-46 emidlalweni engu-167, usalobizela ukuqhubeka nokuzishayela amagoli njengoba esesele ngayisithupha kuphela ukufica irekhodi lamagoli angu-52 lenkakha yaleli qembu eseyathatha umhlalaphansi, uBenedict Vilakazi.

“Ukudlala umdlalo wamanqamu yinto efiswa yiwo wonke umdlali webhola. Leli ngelinye ithuba lethu lokuqopha umlando.

"Sinethemba lokuthi sizokwazi ukunqoba isicoco seMTN8 okwehlandla lesine kule mpelasonto,” kusho uMabasa, okholwa wukuthi ukudlalela iqembu elinjengePirates kuhambisana nengcindezi yokunqoba izicoco ngaso sonke isikhathi.

“Waqala nje wadlalela iqembu elikhulu njengePirates, yazi ukuthi usudlalela iqembu elibalwa nahlonishwayo ezwenikazini i-Afrika. Kuzohlezi kunengcindezi kodwa siyakwazi ukumelana nayo singabadlali nabaqeqeshi. Siyejwayele ngakho ngoMgqibelo  sishona khona futhi siyoqopha omunye umlando.”

Kuyaziwa ukuthi eZimnyama zivame ukuthwala kanzima uma zibhekene neStellies. Yize zikwazile ukuyiguqisa ngo 1-0 koweBetway Premiership ngo-Agasti, kule sizini, kodwa akungatshazwa ukuthi kulo mdlalo wakusasa leli qembu laseStellenbosch lizovuka indlobane.

Ngaphandle kwalokho, lo mdlalo wakusasa uthathwa njengowamagqubu kwazise ngesizini edlule eZimnyama yizona ezaguqisa iStellies ngo 3-1 kowamanqamu alo mqhudelwano eMoses Mabhida Stadium, eThekwini.

Kulo mdlalo uMabasa washaya elinye lamagoli elagcina lisuse umsindo kukade kuyi-free kick. Kwasolwa unompempe ngokuthi uvumele iPirates ukuthi isuse ibhola endaweni engafanele, kwagcina kuyigoli. Lokhu kungenye yezinto umdlalo wakusasa ozoqala sisemiqondweni yabalandeli abaningi abakholwa wukuthi yabanjwa inkunzi iStellies nyakenye, eThekwini.