UBarker utusa ithimba elithungatha abadlali ngoMthiyane
UMDLALI oyinjini yasesiswini kwiStellenbosch FC, uMthetheleli Mthiyane, oshaye into ecokeme bedlala ne-Orlando Pirates
Image: BACKPAGEPIX
UMQEQESHI weStellenbosch FC, uSteve Barker, uncome ithimba elithungatha abadlali ngokubuya nezibabuli ezingena khaxa esitayeleni sokudla saleli qembu.
IStellies ikhale ngaphansi ngo 3-0 kwi-Orlando Pirates emdlalweni wamanqamu weMTN8 eMbombela Stadium, eNelspruit, ngoMgqibelo. Kodwa kushone ilanga sekukhulunywa ngomdlali wasesiswini weStellies, uMthetheleli "Viera" Mthiyane waseSikhaleni, eMpangeni. UMthiyane (24), obedlalela iMilford kwiMotsepe Foundation Championship, usayine kwiStellies ngaphambi kokuqala kwesizini ka-2025/2026.
Bekuhloswe ngaye ukuvala isikhala sikaSihle Nduli oseyibamba kwiPirates. Ngaphandle kukaNduli, iStellies isizakhele igama ngokusayinisa abadlali abasebancane abagcina sebezakhele igama eMzansi okubalwa kubona uThabo Moloisane owakhulela kwiMamelodi Sundowns, Omega Mdaka owaxoshwa yiKaizer Chiefs, Langelihle Phili owayedlalela AmaZulu nabanye.
“Ithimba lethu elisibhekela abadlali lenza umsebenzi omuhle kakhulu noncomekayo. Siyiqembu elingakhiphi izindodla zemali ukuthenga abadlali. Ngakho esikwenzayo yikho ukuthi siphume siyobheka ithalente labadlali abangaziwa nabalambele ukuzakhele igama ebholeni njengaye uMthetheli nabanye abaningi esikwazile ukubathola kula masizini edlule,” kusho uBarker, ekhuluma nabezindaba ngemuva kowamanqamu eMTN8.
“UMthetheleli udlala kahle kakhulu, ungumfana ozimiselayo kakhulu osebenza ngokukhulu ukuzikhandla ukuthola impumelelo ebholeni elikhokhelayo. Ukuzinikela kwakhe emsebenzini wakhe kufakazelwa yinto ayenza ngenkathi sigcina ukudlala (bedlala neSekhukhune United kwiMTN8), edlala engasitshelanga ukuthi ushonelwe nguyise. Wadlala kahle kakhulu kulowo mdlalo (waqokwa njengomdlali wosuku) phezu kwesimo esasimehlele.”
UMthiyane odlale amasizini amabili kwiMilford ngaphambi kokubonwa yiStellies, ungomunye wabadlali baKwaZulu-Natal abathathwe yileli qembu laseWestern Cape kulesi sifundazwe esesiphenduke imayini yabadlali, okubalwa kubona uNduli, uSibongiseni Mthethwa osekwiKaizer Chiefs noPhili.
IStellies izobuyela ensimini ngomdlalo weBetway Premiership naMaZulu FC ngoLwesithathu ngo-7.30 ebusuku, ePrincess Magogo Stadium, KwaMashu.