ICasric neMilford nezimpawu zokulwela isicoco seChampionship
UMQEQESHI weCasric Stars, uBucs Mthombeni, ezakhe okuyizona ezisahamba phambili kwi-log yeMotsepe Foundation Championship ngokunqoba yomithathu imidlalo esadlaliwe kulesi sigaba
Image: BACKPAGEPIX
NGENDLELA iCasric Stars neMilford FC abayiqale ngayo isizini bakhombisa izimpawu zokulwela ukuba sembangweni wesicoco seligi yeMotsepe Foundation Championship zisabekwa nje ebhandeni.
ICasric edlale amaPSL Promotion Play-Offs ngesizini edlule, iyiqale ngesivuthevuthe le sizini ka-2025/26 yeChampionship njengoba isayinqobe yomithathu imidlalo esayidlalile.
Leli qembu eliqeqeshwa nguBucs Mthombeni, liqhubekile nefomu enhle libhuquzisa iCape Town City ngo 1-0 wegoli likaKabelo Mofokeng ngoMgqibelo, e-Athlone Stadium, eKapa.
ICasric eqongise ingcindezi kwiCity egawulwe yizembe kwiBetway Premiership ngesizini edlule nengakanqobi emidlalweni emithathu yeChampionship, yiyona esaqhwakele kwi-log yeChampionship ngamaphuzu ayisishiyagalolunye.
Ilandelwa yiMilford endaweni yesibili ngamaphuzu ayisithupha, njengoba nayo iqhubekile nokukhombisa ukungasinisi mahleza ngokuqoqa amaphuzu kusakhaya iguqisa iVenda FC ngo 1-0 wegoli likaMenzi “Deco” Chili, eMhlathuze Sports Complex, eRichards Bay, ngoMgqibelo.
Yize iMilford ihlulwe kanye emidlalweni emithathu, kodwa ukunqoba kwayo imidlalo emibili iguqisa neqembu eliyiqale kahle isizini, iVenda FC, kuyinkomba yokuthi izimisele kakhulu kule sizini ngokulwela isicoco seligi.
UMthombeni weCasric, engxoxweni abenayo neSolezwe emasontweni edlule, ukubeke kwacaca ukuthi kule sizini ezakhe zilwela isicoco seligi.
Ngakolunye uhlangothi, iCity eqeqeshwa uJan Vreman waseNertherlands, isadonsa kunzima esigabeni seChampionship phezu kokusayinisa abadlali abanegama kule sizini, okubalwa kubo uNjabulo Ngcobo, uKeagan Dolly, uSifiso Ngobeni obolekwe kwiMamelodi Sundowns. Isayinise nabadlali abathathu bokufika okunguMickey van der Hart waseNetherlands, uJospin Nshimiramana waseRwanda noWalter Bwalya waseZambia.
Imiphumela yemidlalo yeMotsepe Foundation Championship:
Cape Town City 0-1 Casric Stars; Lerumo Lions 1-2 Kruger United; Milford FC 1-0 Venda FC: Hungry Lions 1-0 Leicesterford City; Gomora United 0-0 University of Pretoria; Highbury 1-0 Baroka FC; The Bees 2-0 Midlands Wanderers