AmaProteas esifazane nesifiso sokubuya neNdebe yoMhlaba
UMSHWIBI wamaProteas u-Ayabonga Khaka, ubona seneyilungele iNdebe yoMhlaba yize besazodlala eminye imidlalo ngaphambi kokuthi uqale lo mqhudelwano.
Image: BACKPAGEPIX
UMSHWIBI wamaProteas u-Ayabonga Khaka ukubeke kwacaca ukuthi iqembu lizimisele ukwenza into elingakaze liyenze, ukunqoba iNdebe yomhlaba.
Lo mdlali osedlale imiqhudelwano eminingi neqembu lesizwe ungomunye wabaqokwe umqeqeshi uMandla Mashimbyi ukuba bayomela izwe eNdebeni yoMhlaba yama-One Day International (ODI) ezobanjelwa e-India naseSri Lanka kusukela ngoSepthemba 30 kuya kuNovemba 2.
UKhaka (33) wayekhona ngesikhathi iqembu lakuleli lifinyelela kweyandulela owamanqamu kulo mqhudelwano ngo-2017 nango-2022, lanqotshwa yi-England kuyona yomibili.
Uthe izinhlungu zokukhishwa sebeseduze nomdlalo wamanqamu bazozishintsha baziphendule izifundo ezisobasiza kulo mqhudelwano.
“Kuyo yonke imiqhudelwano esiya kuyona njengeqembu sisuke sinezinjongo esifuna ukuzifeza. Emiqhudelwaneni edlule yeNdebe yoMhlaba besinomgomo owodwa, ukuba ngompetha. Nakulo mqhudelwano ozayo sinesifiso esifanayo, sifuna ukunqoba iNdebe yoMhlaba,” kusho uKhaka.
"Sesiside isikhathi silungiselela lo mqhudelwano. Imidlalo ye-ODI mide futhi kuningi okungashintsha emdlalweni ngamunye. Emiqhudelwaneni edlule sikwazile ukufinyelela kweyandulela kowamanqamu. Siyazi ukuthi sifike kanjani kuyona nokuthi yini eyenze sangadlulela phambili. Sizosebenzisa bonke ubuhlungu esabuzwa njengesikhuthazi ukuze senze kangcono kulokhu.”
AmaProteas azoqala iNdebe yoMhlaba ngokubhekana ne-England emdlalweni wokuqala wamaqoqo ngo-Okthoba 3.
Azophinde adlale nawo wonke amanye amaqembu ayingxenye yalo mqhudelwano, okuyi-India, Australia, New Zealand, Sri Lanka, Pakistan kanye neBangladesh, kuze kucace ukuthi yimaphi amaqembu azodlulela kweyandulela owamanqamu.
“Wonke amaqembu ayingxenye yalo mqhudelwano asezingeni eliphezulu futhi siwahlonipha wonke ngokulinganayo. Noma kunjalo, ngeke sigxile kwamanye amaqembu kodwa into esiyibheke kakhulu ukuthi silandele izinhlelo esiqhamuke naso ngesikhathi silungiselela lo mqhudelwano.”
Ngaphambi kweNdebe yoMhlaba iqembu lakuleli lisazodlala uchungechunge lwemidlalo emithathu ye-ODI nePakistan oluzoqala ngoLwesibili ngo-6.30 ekuseni.
Lizobe selidlala eminye emibili yokuzicijela iNdebe yoMhlaba neBangladesh kanye nePakistan.