Isasasa kwiHollywoodbets 10km ifolosa ngompetha beComrades

UGQISHE ngompetha beComrades Marathon, uTete Dijana noGerda Steyn, umjaho womlenze wesibili weHollywoodbets Joburg 10km ozogijinywa ngoMgqibelo, eGoli.

UDijana udle umhlanganiso kwabesilisa kwiComrades yebanga lika-89.98km ngoJuni kusukwa eMgungundlovu kuyiwa eThekwini, uGerda wanqoba kwabesifazane.

IHollywoodbets Joburg 10km engenelwe ngabagijimi abangu-8000, izogijinyelwa eWanderers Cricket Stadium, eGoli, ngoMgqibelo ngo-7.30 ekuseni.

Kowomlenze wokuqala weDurban 10k eKingsmead, eThekwini, ngo-Agasti 20, umhlanganiso udliwe uKamohelo Mofolo waseLesotho, ogijimela i-Xcell Running Club eshaya isikhathi esingu-27:58. 

Kwabesifazane kunqobe uGlenrose Xaba ogijimela iBoxer Running Club ngesikhathi esingu-31:43. 

UMofolo ube ngumgijimi wokuqala owenze isikhathi esingaphansi kwemizuzu engu-28 kulo mjaho, nobekwenza kubhekwe kakhulu emjahweni wangoMgqibelo ukuthi ukhona yini omunye umgijimi ozokwazi ukwenza isikhathi esingaphansi kwalesi.

Nokho bobabili, uMofolo noGlenrose, abezukuwugijima lo mjaho wangoMgqibelo ngezizathu ezahlukene. Kuvela ukuthi uMofolo ugxile emalungiselelweni eSanlam Cape Town Marathon yebanga lika-42.2km ezoba ngo-Okthoba 19, eKapa.

Kanti uGlenrose asicaci isizathu sokungagijimi kwakhe kulo mjaho weHollywoobets njengoba engeke ayigijime futhi neCape Town Marathon enze ezibukwayo kuyona nyakenye ayinqobe waqopha nerekhodi likazwelonke lika-2:22:22.

Kubukeka ezongela i-Absa Run Your City 10km engoSepthemba 24 eGoli, neSpar Women’s Challenge engoSepthemba 27 eGqeberha nango-Okthoba 5, eGoli, okuyimijaho enze ezibukwayo kuyona kusukela uqalile u-2025.

Ngakho ukungabi bikho kukaMofolo kwenza kubhekwe kakhulu uThabang Mosiako, Stephen Mokoka, Bennett Seloyi noDijana kwabesilisa, njengoba noKabelo Mulaudzi othathe isibili eThekwini engezukugijima koweHollywoodbets ngoMgqibelo.

Kwabesifazane sekubhekwe uGerda, uFreda Ndinda waseKenya, u-Irvette Van Zyl noKarabo More, kwazise uNehenge Khatala waseLesotho eyoyibamba kowe-World Athletics Championships, eTokyo, eJapan, oqala ngoMgqibelo. 

Ekhuluma nabezindaba uGerda ogijimela iHollywood Athletics Club, ukubeke kwacaca ukuthi uzosebenzisa lo mjaho ka-10km weHollywoodbets ukuzivivinyela ukuyoyibamba kwiCape Marathon ngo-Okthoba.

“Ngijabule kakhulu ngokuba yingxenye yalo mjaho weHollywoodbets 10km, engizobe ngiqala ukuwugijima ngigqoke imifaniswano yeHollywood AC.

Okukhulu engikuzele kulo mjaho ukuzozilungiselela iSanlam Cape Town Marathon ezokuba ngenyanga ezayo.

Ukugijima kwami lo mjaho webanga lika-10km kuwubufakazi bokuthi ukugijima imijaho yamabanga amade akusho ukuthi ngeke ukwazi ukugijima eyamabanga amafishane.

Ngizogijima ngokuzimisela kulo mjaho, noma ngazi ukuthi akuzukuba ngumjaho olula,” kusho uGerda ophethe irekhodi lika-5:44:54 labesifazane leComrades. 

UDijana ophethe irekhodi lika-5:13:58 leComrades, uthe uzimisele kakhulu ngokukhipha unyawo kulo mjaho nakuba ekuqonda ukuthi akuzukuba lula kuyena njengoba engumuntu ogxile emabangeni amade.

“Umzila walo mjaho waseGoli unzima kodwa ngizimisele ngokwenza kahle kulo mjaho. Angifuni ukuthi ngizosebenzisa wona ukulungiselela eminye imijaho, cha. Kodwa ngizowugijima ngoba ungumjaho obalulekile njengeminye engizimisele ngokuyigijima igijinywe,” kusho uDijana ogijimela iNedbank Running Club.