Kuzophela amaphupho ngabazodlala kwi-SA20
UMSHWIBI osemncane uNqobani Mokoena ngomunye wabadlali abangase bathengwe endalini ye-SA20 namuhla.
Image: FACEBOOK
UYIBHEKE ngabomvu indali yabadlali abazodlala kwiBetway SA20 ezoba seGoli namuhla ngo-2 ntambama owayengumdlali wekhilikithi, uNono Pongolo.
Lo mdlali owake wagijima kwiHighveld Lions osengumsakazi nomhlaziyi wekhilikithi kwithelevishini ukholelwa ekutheni le ndali izoqhakambisa ukuthi iNingizimu Afrika icebe kangakanani ngabadlali abasezingeni eliphezulu nokuthi lo mqhudelwano usukhule kangakanani selokhu wasungulwa ngo-2022 njengoba usuheha abadlali abahamba phambili emhlabeni.
Amaqembu ayisithupha, iJoburg Super Kings, Pretoria Capitals, Durban Super Giants, Sunrisers Eastern Cape, MI Cape Town kanye nePaarl Royals azobe ebheke ukugcwalisa izikwati zawo ngaphambi kwesizini ezoqala ngoDisemba 26.
UPongolo uthiphe uMatthew Breetzke, Dewald Brevis no-Aiden Markram kubadlali bakuleli abazothengwa ngemali eshisiwe.
“UBreetzke usefomini emangalisayo, uBrevis uzibonakalisile ezinyangeni ezingu-12 ezidlule ukuthi useqinelwe wukhakhayi, kanti u-Aiden Markram ungumdlali nomholi oqotho. Simbonile ehola iSunrisers Eastern Cape idla izicoco ezimbili futhi ngikholwa wukuthi izokwenza konke okusemandleni ukuthi imgcine,” usho kanje.
Ngaphandle kwalezi zihlabani ezaziwayo, uPongolo ukubheke ngabomvu ukubona amaqembu etshala imali kubadlali abancane abanekusasa eliqhakazile.
"Ngifuna ukubalula umshwibi osheshayo osemusha ongihlabe umxhwele muva nje, uNqobani Mokoena. Mncane futhi ushwiba ngesivinini. Lo mqhudelwano umayelana nesizukulwane esilandelayo nokuzama ukuthola indlela yokuthuthukisa laba badlali abazoba yizihlabani zangomuso,” uqhube kanje.
Njengoba kunabadlali abangaphezu kuka-500 abavela emhlabeni wonke abasohlwini lokhu kugcizelela ukuthi i-SA20 isithathwa njengomunye wemiqhudelwano ehamba phambili ye-T20 emhlabeni.
UPongolo uthe uthanda umthelela omuhle lo mqhudelwano onawo ekukhuliseni ikhilikithi yakuleli.
"Uma ubheka indlela amaProteas enza ngayo manje ezingeni lomhlaba, kuyabonakala ukubaluleka komqhudelwano onjengalona. Awugcini nje ngokunikeza abadlali ithuba lokuzwa ingcindezi yokudlala ezinkundleni ezigcwele, kodwa ubanika nelokusondelana nabadlali abaziwayo emhlabeni jikelele,” kusho yena.
Indali ye-SA20 izosakazwa bukhoma esiteshini iSuperSport Cricket ku-Channel 212.