UKhonkhobe ulobizela ukuvala unyaka ngokunqoba iCity to City neSoweto
UMGIJIMI, u-Onalenna Khonkhobe, olobizela ukuqeda unyaka ngenothi eliphezulu ngokunqoba iCity to Ctiy Marathon ngoSepthemba nge-African Bank Soweto Marathon ngoNovemba
Image: ONANELENNA KHONKHOBE FACEBOOK
UMGIJIMI wamabanga amade, u-Onalenna Khonkhobe, ubheke ukuvala unyaka ngenothi eliphezulu ngokwenza ezibukwayo emijahweni emibili, iCity to City Marathon ne-African Bank Soweto Marathon.
ICity to City yebanga lika-50km, ehlanganisa namabanga ka-10km no-5km, izogijinywa ngoSepthemba 28 kusukwa eMarlboro Gautrain Station, eGoli, isongwe ePilditch Stadium, ePitoli.
Ozodla umhlanganiso kwiCity to City uzokhala emuke no-R200 000, kube ngu-R10 000 ku-10km, no-R5 000 ku-5km.
Lo mjaho waminyaka yonke, nyakenye unqotshwe nguNtsindiso Mphakathi kwabesilisa ngesikhathi esingu-2:52:28, noShelmith Muriuki waseKenya kwabesifazane ngo-3:13:04.
ISoweto Marathon yebanga lika-42.2km ezogijinywa ngoNovemba 30 nonyaka, nyakenye inqotshwe uKhonkhobe ngesikhathi esingu-2:18:36, kwabesifazane kwanqoba uNeheng Khatala ngo-2:43:07.
UKhonkhobe (29) odabuka eTaung, eNorth West, onqobe iPrince Mangosuthu Ultra Marathon yebanga lika-52km ngo-Ephreli, uzobe eyigijima okokuqala iCity to City nonyaka.
“Anginayo ingcindezi, futhi angisabi muntu (kubagijimi). Engikufunayo nje ukuwina umjaho. Ngonyaka odlule bengiyigijima okokuqala iSoweto Marathon, ngingawazi umzila wayo, ngayiwina.
Nakulo nyaka futhi ngiyigijime okokuqala iPrince Mangosuthu Marathon ngingawazi umzila, nayo ngayiwina, nayo futhi iCity to City ngizoyigijima okokuqala. Ngizimisele ngokuyiwina,” kusho uKhonkhobe ngokuzethemba.
Lo mgijimi ogijimela iNedbank Running Club, nyakenye uqophe umlando ngokunqoba imijaho emibili yamabanga amade, iTotalsports Two Oceans Marathon yebanga lika-56km neSoweto Marathon.
“Yebo ngizoyigijima yomibili le mijaho, iCity to City neSoweto Marathon. Ngemuva kokugijima iCity to City ngoSepthemba 28, ngizophumula izinsuku eziyisikhombisa ngaphambi kokulungiselela iSoweto. Ngizimisele ngokuyiwina yomibili le mijaho, njengoba nangonyaka odlule ngakwazi ukuwina iTwo Oceans neSoweto. Kulo nyaka ngihlulekile wukuvikela isicoco kwi-Two Oceans, kodwa ngabuya ngePrince Mangosuthu, manje sengibheke le emibili ukuqeda unyaka ngesitayela ngokuwina imijaho emithathu yamabanga amade,” kuphetha uKhonkhobe oqeqeshwa nguPio Mpolokeng.