Kubhekwe elaseMzansi ekubuyiseni isithunzi kowe-World Championships

IQEMBU elizomela iNingizimu Afrika kwi-World Athletics Championships eTokyo, eJapan,  linenselelo yokubuyisa isithunzi kulo mqhudelwano osekube ngamahlandla amathathu kulandelana libuya nenduku yombangandlala. 

I-World Athletics Championships yanonyaka eseJapan, e-Asia, izoqala ngoSepthemba 13 kuya ku-21.

Kulo mqhudelwano omkhulukazi wezokugijima emhlabeni okuzobe kudlana imilala kuwona abagijimi abangaphezulu kuka-2000 bemele amazwe angu-200, iNingizimu Afrika izobe imelwe ngabangu-49. Bangu-32 besilisa kanti bangu-17 abesifazane emabangeni ehlukene kuya kwi-high jump, long jump ne-javelin. 

Iqembu laseNingizimu Afrika elagcina ukubuya nezindondo elango-2017 elabuya namagolide amathathu atholwa uLuvo Manyonga, uWayde van Niekerk noCaster Semenya, ezimbili zethusi ezatholwa uRuswahl Samaai noSemenya, neyesiliva eyabuya noVan Niekerk, e-England.

Kanti ngo-2019 eQatar, ngo-2022 e-USA, naseBudapest, eHungary ngo-2023, iqembu laseMzansi alibuyanga ngsiho neyokubika indondo. 

Ezibabulini zabagijimi bakuleli okubekwe amathemba okubuya nezindondo kubona, kubalwa u-Akani Simbine ebangeni lika-100m, uVan Niekerk ku-200m, uZakithi Nene ku-400m, uPrudence Sekgodiso ku-800m, noJo-Ane du Plessis kwi-javelin. 

Yize uVan Niekerk ezakhele kakhulu igama ngokwenza ezibukwayo nokuzuza izindondo ku-400m kodwa muva nje uya ngokuya esezinekele ku-200m njengoba naseTokyo eyodlana imilala nezinye izinsephe zomhlaba kuleli banga. 

Yize uBayanda Walaza efakiwe ohlwini lwabagijimi abazomela iNingizimu Afrika eJapan kodwa ebukeka emancane amathuba okuthi agijime njengoba esalulama ekulimaleni kulandela ukudonseka umsipha koweDiamond League, eZurich, eSwitzerland, ngeledlule. 

Nokho ngokwe-Athletics South Africa (ASA) kusalindwe imiphumela ezophuma maduze  yokuhlolwa kwakhe yithimba lodokotela ukuqinisekisa ukuthi uzokulungela yini ukuyibamba kulo mqhudelwano oseJapan ngelizayo. 

Kwabesifazane, ukwenza kahle kukaSekgodiso kwiDiamond League ngeledlule eSwitzerland, kumbeka ethubeni elihle lokuqhubeka nomgqigqo koweWorld Championships. UNene okunguyena kuphela umgijimi odabuka KwaZulu-Natal ozobe eyibambe kulo mqhudelwano, naye kubhekeke enze kahle kulo mqhudelwano.

USimbine osenze kahle nonyaka emijahweni eyahlukene okubalwa neDiamond League, ngaphandle kokubhekwa ku-100m, kubhekwe ahole ngempumelelo iqembu le-relay lika-4x100m eligqishe ngoSinesipho Dambile, uBradley Nkoana, noWalaza. Leli qembu lenze ezibukwayo kwi-World Athletics Relay, eGuangzhou, eChina ngoMeyi nonyaka. 

Kwi-marathon kubhekwe insephe engumakadebona, u-Elroy Gelant.