AmaProteas asashelela ngaphansi kukaConrad
AMA-PROTEAS ejabulela iwikhethi emdlalweni we-ODI ne-England.
Image: PA
IQEMBU lesizwe lekhilikithi labesilisa lizongena emdlalweni wokugcina we-One Day International (ODI) ne-England lingasenayo ingcindezi njengoba seliqinisekisile ukuthi lilunqobile uchungechunge.
AmaProteas ne-England bazohlangana okwesithathu emdlalweni wokugcina ozoqala ngo-12 emini e-Utilita Rose Bowl, eSouthampton.
Iqembu likaShukri Conrad lizenzele izinto zaba lula ngokunqoba umdlalo wokuqala ngamawikhethi ayisikhombisa ngoLwesibili, ngaphambi kokuthatha owesibili ngama-run amahlanu e-Lord’s Cricket Ground ngoLwesine.
Ngokwenza lokhu, leli qembu eliholwa nguTemba Bavuma linqobe uchungechunge lwe-ODI e-England okokuqala kusukela ngo-1998.
Umdlali obhethayo, uMatthew Breetzke, oshaye ama-run angu-85 ngoLwesine, uncome iqembu kanye nomqeqeshi u-Shukri Conrad ngemiphumela emihle yakamuva.
UConrad uqokwe njengomqeqeshi weqembu lesizwe le-ODI nele-T20 ngoMeyi nonyaka kulandela ukushiya kukaRob Walter. Phambilini ubecija elemidlalo yeTest kuphela.
"Ngicabanga ukuthi kuqala phezulu kuShukri Conrad, indlela aqoka ngayo iqembu nendlela afuna ukuyihamba neqembu. Ukucacisa kahle akufunayo, akekho onokungabaza. Ngakho abadlali bazizwa bekhululekile futhi kuyabonakala enkundleni," kusho uBreetzke.
"Sijabule ngokunqoba olunye uchungechunge. Sizobhiyoza kodwa futhi siyazi ukuthi usekhona omunye umdlalo esingathanda ukuwunqoba."
UBreetzke uqophe irekhodi elisha ngokuba ngumdlali wokuqala emlandweni ukuthola okungenani ama-run angu-50 emidlalweni emihlanu yokuqala ye-ODI ayidlale eqenjini lesizwe.
Ngemuva kokusonga uchungechunge lwe-ODI kusasa, amaProteas azobe esegxila emidlalweni emithathu ye-T20 ezoqala ngoLwesithathu eSophia Gardens, eCardiff.