AmaBokke esifazane nesifiso sokubamba umgqigqo kweyoMhlaba

IPHINI lomqeqeshi wamaBhokobhoko esifazane, uLaurian Johannes-Haupt, lifuna iqembu lingabe lisawulahla umgqigqo omuhle eliqale ngawo eNdebeni yoMhlaba njengoba lizosonga isigaba samaqoqo ngokubhekana neFrance kuPool D. 

AmaBhokobhoko neFrance bazogadulisana eFranklin’s Gardens, edolobheni iNorthampton, e-England, ngo-5.45 ntambama.

Womabili la maqembu ayinqobile imidlalo emibili yamaqoqo asayidlalile. Elakuleli livule umqhudelwano ngokuqumba phansi iBrazil ngo 66-6, laguqisa i-Italy ngo 29-24, lazibekisela indawo kuma-quarterfinal okokuqala ngqa.

IFrance inqobe i-Italy ngo 24-0 kowokuvula, yaphinde yabhudluza iBrazil ngo 84-5 kanti nayo isingenile kweyomkhumulajezi.

Umdlalo wakusasa uzocacisa ukuthi yiliphi iqembu elizoqeda esicongweni kuleli qoqo, bese libhekana nelizolala isibili kuPool C phakathi kweNew Zealand ne-Ireland abasabambene ngamaphuzu angu-10.

Iqembu lakuleli yilona eliqhwakele kuPool D ngamaphuzu angu-10, kanti iFrance isendaweni yesibili ngamaphuzu ayisishiyagalolunye.

AmaBokke neFrance bahlangana esigabeni samaqoqo eNdebeni yoMhlaba yango-2022, kwanqoba iFrance ngo 40-5.

“IFrance ikleliswe endaweni yesine emhlabeni, iqede endaweni yesibili kwiSix Nations futhi inesipiliyoni sokudlala emiqhudelwaneni emikhulu njengeNdebe yoMhlaba. Basezingeni elifanayo namaqembu esizobhekana nawo esigabeni esilandelayo somkhumulajezi, ngakho-ke lo mdlalo uzosisiza kakhulu,” kusho uJohannes-Haupt.

“Sike sazilolonga nabo ngesikhathi sivakashele phesheya ngo-Ephreli futhi lokho kusisizile ngoba abadlali bakwazile ukubona ukuthi yini abangayilindela uma sebebhekene naleli qembu. Yize kwakuwukuzilolonga nje kodwa kuningi esakufunda.

“Umgqigqo omuhle oqale ezinyangeni ezimbalwa ezedlule ngesikhathi silungiselela lo mqhudelwano usinika ithemba. Sinezinhlelo ezithile esihlose ukuzisebenzisa kulo mdlalo. Kungaba yiphutha ukuthi sisuke endleleni yethu yokudlala yokuhlasela nokusebenzisa amandla esisebenzele ezinyangeni ezedlule.”

UJohannes-Haupt uthe abakhathazekile ngokuthi yiliphi iqembu abazogcina bedlale nalo kuma-quarterfinal phakathi kweNew Zealand, esendaweni yesithathu emhlabeni, ne-Ireland, ekweyesihlanu.

“Lowo mdlalo uzolandela ngempelasonto ezayo futhi asikazihluphi ngokucabanga ukuthi sizobhekana naliphi iqembu ngoba siyazi ukuthi isigaba somkhumulajezi sizoba nzima. Sifuna ukudlala namaqembu ahamba phambili futhi kuzobanjalo. Yilokho esikuzele,” kuphetha lo mqeqeshi.