IMilford nezinhloso zokulwela isicoco seligi yeChampionship

UMGADLI weMilford FC, uNqaba Xulu, uveze ukuthi usihlalo omqeqeshi waleli qembu, uXanti Pupuma, ufuna ukubona leli qembu lilwela ukunqoba isicoco seligi yeMotsepe Foundation Championship kule sizini esikhundleni sokulwela ukuyodlala kumaPlay-Offs. 

IMilford ingelinye lamaqembu amabili aKwaZulu-Natal adlala kwiMotsepe Championship kule sizini. Elinye yiMidlands Wanderers yaseMgungundlovu engomakoti kulesi sigaba. 

Ngesizini edlule iMilford iqede endaweni yesithupha kwi-log, yaphuthelwa yithuba lokuzibekisela indawo kuma-PSL Promotion Play-Offs.

UXulu (24) ongomunye wabadlali abaqavile kuleli qembu laseRichards Bay, ulishayele igoli lokunqoba liguqisa iLerumo Lions ngo 1-0 kowokuvula wesizini.

Nokho, ngesonto eledlule liguqiswe yiCasric Stars ngo 1-0 esazihola phambili kwi-log Championship emidlalweni emibili esadlaliwe kule sizini esanda kuqala. 

“Ngaphambi kokuqala kwesizini, usihlalo (uPupuma) ukubeke kwacaca kithina ukuthi ufuna kule sizini silwele ukuwina iligi sikhuphukele kwiBetway Premiership, hhayi amaPlay-Offs.

"Ngakho yiyonanto esibophezele ngayo kule sizini, kusukela emdlalweni wokuqala esiwuwinile sishaya iLerumo. Ukushaywa kwethu yiCasric emdlalweni wesibili akusithenanga amandla ngoba isaqala isizini iseminingi kakhulu imidlalo esazodlalwa futhi siwabonile amaphutha esiwenzile kuloya mdlalo nesizimisele ngokusebenzisa leli khefu leFifa ukulungisa amaphutha,” kusho uXulu. 

IMilford izobuyela ensimini ngemuva kwekhefu leFifa ngomdlalo wasekhaya neVenda FC ngoSepthemba 13.

Lo mgadli odabuka KwaNongoma, ojoyine iMilford ngesizini edlule esuka kwiNjampela FC edlala kwiSafa KwaZulu-Natal ABC Motsepe League, ushaye amagoli amane ngesizini edlule.

Ukuvula kwakhe isizini ngegoli kumgqugquzele njengoba ezibekele umgomo wokushaya amagoli angaphezulu kwayishumi kule sizini yakhe yesibili esigabeni seChampionship. 

“Okungigqugquzela kakhulu ukuzibona ngidlala esigabeni seBetway Premiership ngesizini ezayo ngakho kuzobaluleka kakhulu ukuthi sisebenze ngokukhulu ukunikela nokuzikhandla ukufeza isifiso sabaphathi beqembu nesethu singabadlali sokubona leli qembu likhuphukela kwiBetway," kusho uXulu.