IGalaxy ivale igebe esicongweni seSuper League

I-TS Galaxy Queens iqhubekile nokunciphisa igebe lamaphuzu phakathi kwayo neMamelodi Sundowns embangweni wesicoco seligi yeSafa Hollywoodbets Super League ngokushaya i-University of Johannesburg ngo 2-0 eSoweto Campus Stadium, eSoweto, ngeSonto. 

Amagoli ka-Alicia Terhart noLeandra Smeda yiwona aqinisekise ukuthi iGalaxy Queens ibuya nawo ephelele amaphuzu. 

Leli qembu laKwaNdebele, eMpumalanga, linamaphuzu angu-40 emidlalweni engu-17. Selihlukaniswe yiphuzu neSundowns esaqhwakele kwi-log ngamaphuzu angu-41 emidlalweni engu-17. 

Ukujahana eduze kweGalaxy Queens neSundowns Ladies kusho ukushintsha kwezinto kule sizini ngombango wesicoco seligi yalesi sigaba okokuqala kusukela sasungulwa ngesizini ka-2019/20. ISundowns isikhonye kwiHollywoodbets amasizini ayisihlanu elandelana ngegebe elikhulu lamaphuzu phakathi kwayo namaqembu ayilandelayo. 

Kwenzeka lokhu nje, ne-University of Western Cape (UWC) eyaziwa ngokuphonsela iSundonws inselelo embangweni weligi, izinto aziyihambeli kahle njengoba iqhubeka nokulahla amaphuzu kulandelana. NgoMgqibelo ishaywe i-TUT Football Club ngo 1-0 e-UWC Stadium, eKapa. 

Leli qembu eliqeqeshwa nguThinasonke Mbuli lisendaweni ka-13 kwi-log yeSuper League ngamaphuzu angu-21 emidlalweni engu-17.

Ukwehluleka kweSundowns ukuzibekisela indawo kwiCaf Women’s Champions League ihlulwa yiZesco Ndola Girls yaseZambia kweyokuhlungela iChampions League ngeledlule, kusho ukuthi leli qembu eliqeqeshwa wuGodfrey Sapula selizogxila ngokuphelele ekulweleni ukuvikela isicoco seSuper League.

Kuzobhekwa ngabomvu ukuthi ukubuya kwaBantwana BaStyle kuzowushubisa kanjani umbango phakathi kwayo ne-Rockets.

IGalaxy Queens izodlala neCity Lads ngoMgqibelo eWestbourne Oval, eGqeberha, ngo-3 ntambama.

Kanti iSundowns izobuyela ensimini ngokubhekana ne-University of Fort Hare ngoSepthemba 14.

Khonamanjalo, kuqhubekile nokuba mnyama emaqenjini aKwaZulu-Natal, iDurban Ladies neRoyal AM njengoba ewukudla kwenduku kule sizini.

IDurban esemsileni kwi-log futhi engakanqobi nowodwa umdlalo kwengu-20, ishaywe yiFirst Touch Ladies ngo 2-1, kwathi i-AM esendaweni ka-15 kwi-log yanenebulwa yi-JVW FC ngo 5-0.

Kulamule i-Ezemvelo Women’s FC enqobe iCity Lads ngo 1-0 ngoMgqibelo. Leli qembu laseMlaza elingomakoti kulesi sigaba, lisendaweni yesishiyagalombili kwi-log.

Imiphumela yeHollywoodbets Super League: 

First Touch FC Ladies 2-1 Durban Ladies; UWC 0-1 TUT Football Club; University of Fort Hare 0-0 UCT; City Lads 0-0 Ezemvelo Women’s FC; University of JHB 0-2 TS Galaxy; JVW FC 5-0 Royal AM; University of Pretoria 4-0 Richmond United