IMidlands nenselelo yomgqigqo koweMotsepe neBaroka
UMQEQESHI weMidlands Wanderers, uVincent Myeni, nabadlali bakhe nenselelo yokuqhubeka nomgqigqo emdlalweni wabo wasekuhambeni neBaroka FC namuhla ntambama eMafori Mphahlele Stadium, eLebowakgomo
Image: MIDLANDS WANDERERS FACEBOOK
NGEMUVA kokuqala ngonyawo oluhle kweMidlands Wanderers emdlalweni wayo wokuvula wesizini ka-2025/26 yeMotsepe Foundation Championship, kulindeleke kubonakale ukuthi leli qembu lizokwazi yini ukugcina umgqigqo ofanayo eliqale ngawo kowokuvula ngeledlule.
IWanderers, engelinye lamaqembu angomakoti esigabeni seChampionship, iqoqe amaphuzu amathathu idlalela ekhaya ngeledlule eHarry Gwala Stadium, eMgungundlovu, ishaya iHungry Lions ngo 1-0.
Leli qembu laseMgungundlovu eliqeqeshwa uVincent “Masenti” Myeni, lizodlala ekuhambeni neBaroka FC eMafori Mphahlele Stadium, eLebowakgomo, namuhla ngo-3 ntambama.
Ngemuva kokuguqisa iHungry Lions ngeledlule, uMyeni uphinde wakugcizelela ekhuluma nabezindaba ukuthi usazoqhubeka nokukholelwa kubadlali abasebancane iningi labo asuke nalo esigabeni seSafa ABC Motsepe League.
Yize iWanderers igqishe ngeningi labadlali abasebancane elingenawo amava okudlala esigabeni esikhokhelayo kodwa abanamava okubalwa kubona uKhulekani Shezi noSanele Gaxa, yibona okubhekwe baqinise ukhakhayi injejane yaleli qembu.
Abafana Bebatha bayobhekana neBakgaga eyiqale ngebatha isizini yeChampionship ngeledlule ishaywa ngo 2-1 yi-The Bees engomakoti kulesi sigaba eqeqeshwa uHumphrey Mlwane.
Leli qembu laseLimpopo eliqeqeshwa uDan “Dance” Malesela, akungatshazwa ukuthi ukubuya kwalo esibhaxwini se-The Bees nokudlalela kwalo ekhaya kowanamuhla kuzoba yisikhuthazi esikhulu sokulwela ukubuyisa isithunzi.
Kweminye imidlalo ebhekiwe kule mpelasonto, kubalwa oweHungry Lions neCape Town City, eMxolisi Dicky Jacobs Stadium, e-Upington, namuhla ngo-3 ntambama.
ICity egawulwe yizembe kwiBetway Premiership ngesizini edlule, ilokhu iqhubekile nokuqinisa isikwati sayo ngabadlali abanohlonze. Kuleli sonto isayinise uKeagan Dolly osuka kwiTS Galaxy nozakhele udumo kwiMamelodi Sundowns neKaizer Chiefs eminyakeni edlule.
Nokho ukuqala isizini ngokudlala ngokulingana ngo 0-0 neVenda FC ngeledlule, kubukeka kuletha inselelo kuleli qembu likaJohn Comitis osekufanele libhukule uma lizimisele ngokulwela ukubuyela esigabeni sePremiership ekupheleni kwale sizini.
Imidlalo yeMotsepe Foundation Championship:
Namuhla - Ngo-3ntambama:
Hungry Lions v Cape Town City (Mxolisi Dicky Jacobs Stadium); Baroka FC v Midlands Wanderers (Mafori Mphahlele Stadium); Venda FC v Gomora United (Thohoyandou Stadium); Kruger United v Highbury (Kanyamazane Stadium); Leicesterford City v Upington City (Lucas Moripe Stadium)
Kusasa - Ngo-3ntambama:
University of Pretoria v Black Leopards (Tuks Stadium); Lerumo Lions v The Bees (NWU Mafikeng Stadium)