IDowns ivunwa wumlando uma ibhekene neChiefs kweyeligi
U-PETER Shalulile weMamelodi Sundowns owathathwa eshikilisana noPule Mmodi weKaizer Chiefs kowandulela owamanqamu eNedbank Cup ngo-Ephreli
Image: BACKPAGEPIX
UKUKHONYA kweMamelodi Sundowns isikhathi eside uma ibhekene neKaizer Chiefs emidlalweni yeligi kungenye yezinto ezidala isasasa ngomdlalo wala maqembu.
ISundowns izogadulisana neChiefs koweBetway Premiership eFNB Stadium, eNasrec, namuhla ngo-7.30 ebusuku.
IChiefs okuyiyona edlalela ekhaya, iyiqale ngonyawo oluhle isizini yePremiership njengoba isayinqobe yomithathu imidlalo esayidlalile.
Ngakolunye uhlangothi, amaSandawana eza kulo mdlalo nje asazikhotha amanxeba ngemuva kokukhishwa yi-Orlando Pirates kowandulela owamanqamu weMTN8 ngo 4-1 sekukhahlelwa amaphenathi ngempelasonto edlule.
Ngaphandle kwalokho, aqale isizini ngokudlala ngokulingana ngo 1-1 neChippa United kowokuvula isizini yePremiership, alandela ngokunqoba emibili eshaya AmaZulu FC neMagesi FC ngo 2-0.
Igcina ukutholana phezulu iSundowns neChiefs ngesizini edlule, Amakhosi aguqise AmaSandawana ngo 2-1 kowandulela owamanqamu weNedbank Cup. Aqede ishobolo lamasizini amane ewukudla kwenduku yaleli qembu lasePitoli.
IChiefs yagcina ukuhlula iSundowns kwiligi ngesizini ka-2020/2021, nokuyiwona kuphela umdlalo leli qembu elahlulwa kuwona ngaleyo sizini linqoba isicoco seligi yePremiership. Ngesizini ka-2021/2022, badlala ngokulingana ngo 1-1 emzuliswaneni wokuqala, iSundowns yanqoba ngo 2-0 kowesibili. Ngeka-2022/2023, iChiefs yakhala ngaphansi ngo 1-0 nango 4-0. Kwaba ngesifanayo ngesizini ka-2023/2024, iSundowns ishaya iChiefs ngo 2-1, yaphinda yayibhubhudla ngo 5-1. Ngesizini edlule, kuphinde kwababhedela Amakhosi eshaywa yiSundowns ngo 1-0 nango 4-0 kwiligi.
Akubuzwa ukuthi lo mlando uzokwenza iSundowns ingene enkundleni ishayela phezulu kwazise sekujwayelekile ukuthi iyayibhubhudla iChiefs.
Inselelo ebhekene nomqeqeshi wamaSandawana, uMiguel Cardoso eyokugwema ukushaywa ngelinye iqembu laseSoweto ngemuva kwezinsuku ezimbalwa iguqiswe yiPirates.
AmaSandawana asekhonye isikhathi eside emidlalweni yePremiership uma ebhekene nala maqembu aseSoweto kodwa eZimnyama ziyibhincisela nxanye emidlalweni yomkhumulajezi.
Ngakho ukwehlulwa kwawo emdlalweni wanamuhla akungatshazwa ukuthi kungamfakela ingcindezi enkulu uCardoso kubalandeli baleli qembu asebevele beqalile ukushaya amakhala ngaye.