Omakoti bayivule ngonyawo oluhle eyeMotsepe Championship

AYIVULE ngonyawo oluhle isizini ka-2025/26 yeMotsepe Foundation Championship amaqembu angomakoti kulesi sigaba iGomora United, i-The Bees neMidlands Wanderers, ebuya namaphuzu aphelele emidlalweni yawo yokuvula isizini ngempelasonto. 

Womathathu la maqembu akhushulelwe kwiMotsepe Championship ngokuphumulela kumaPlay-Offs kazwelonke eSafa ABC Motsepe League ngoJuni, ePitoli.

IGomora United yase-Alexandra, eGoli, ivule isizini ngokubuya namaphuzu aphelele ishaya iLeicesterford City ngo 1-0 wegoli likaXola Mosiea eTUT Stadium, ePitoli, ngoLwesihlanu. 

IThe Bees yaseNkomazi, eMpumalanga, ishaye iBaroka FC ngo 2-1 KaNyamazane Stadium, kaNyamazane, izolo. 

IMidlands iguqise iHungry Lions ngo 1-0 wephenathi kaSmiso Gazu eHarry Gwala Stadium, eMgungundlovu, ngeSonto ntambama.

Ngaphandle kweMidlands yaseMgungundlovu, elinye iqembu laKwaZulu-Natal, iMilford FC, nalo liyivule ngonyawo oluhle isizini ngokuguqisa iLerumo Lions ngo 1-0 wegoli likaNqaba Xulu, eChatsworth Stadium, eThekwini.

Kanti iCape Town City okuyisizini yayo yokuqala kwiMotsepe Championship kulandela ukugawulwa kwayo yizembe kwiBetway Premiership ngedlule, ibuye nephuzu emdlalweni wayo wasekhaya wokuvula isizini ibambana ngo 0-0 neVenda FC e-Athlone Stadium, eKapa, ngoMgqibelo. 

I-The Bees iqeqeshwa uHumprey Mlwane owazakhela udumo esagijima kwiKaizer Chiefs eminyakeni edlule, iHungry Lions iqeqeshwa uJohnny Ferreira osengumakadebona ekuqeqesheni kulesi sigaba. 

IWanderers eqeqeshwa uVincent “Masenti” Myeni ophinde abe ngusihlalo waleli qembu, ukuqala kwayo isizini ngonyawo oluhle kunika ithemba kwazise ilahlekelwe ngabadlali abayisikhombisa ngaphambi kokuqala kwesizini besayiniswa yiLamontville Golden Arrows. 

ICasric Stars edlale kumaPSL Promotion Play-Offfs ngesizini edlule, nayo ikhombise izimpawu zokuba yiqembu elisazogqilaza kule sizini ngokunenebula iBlack Leopards ngo 3-0 ngoMgqibelo eThohoyandou Stadium, eVenda. 

Imiphumela yeMotsepe Foundation Championship: 

Gomora United 1-0 Leicesterford; Higbhury 1-1 University Of Pretoria; Cape Town City 0-0 Venda FC; Milford FC 1-0 Lerumo Lions; Upington 4-2 Kruger United; Black Leopards 0-3 Casric Stars; The Bees 2-1 Baroka FC; Midlands Wanderers 1-0 Hungry Lions