I-All Stars ethubeni lokugudluza iSunflower embangweni weligi yeKZN Sasol

IPHINDE yabuyela esicongweni se-log ka-Stream B weSafa KwaZulu-Natal Sasol League, i-All Stars ngokuguqisa iSunflower WFC ngo 1-0 komunye wemidlalo yakulesi sigaba ngeSonto, e-John Dube High Sports Ground, KwaMashu.

I-All Stars igudluze iSunflower ebiqhwakele ku-Stream B. Leli qembu laKwaMashu elingomakoti kwiSasol, alikahlulwa emidlalweni emihlanu esadlaliwe kule sizini, futhi likhombisa ukuba yingozi kule sizini. Lingase libhincisele nxanye iSunflower embangweni weligi kulesi -stream. 

I-All Stars ihlezi phezulu ngamaphuzu angu-11 emidlalweni emihlanu, iSunflower isendaweni yesibili ngayisishiyagalolunye.

Kwenzeka lokhu nje, iNewcastle Chess neLindelani Ladies baqhubekile nokuqoqa amaphuzu ku-Stream A naku-Stream C ngokwehlukana. Womabili la maqembu angakahlulwa nangakawalahli amaphuzu, aseqoqe angu-15 emidlalweni emihlanu esadlaliwe kule sizini yeSasol. 

INewcastle iqhubekile nokuqoqa amaphuzu ishaya iPSG Amabhaca Ladies ngo 2-0 ku-Stream A, eJefrey Zungu Turf, eXobho.

ILindelani nayo ibuye namaphuzu ishaya iDiski Pros Academy ngo 2-0 eKokstad kuStream C.

Njengoba kule mpelasonto kuqala umzuliswano wesibili wesizini, kukhomba ukuthi le sizini yeSasol izoshesha isongwe, kudlalwe amaPlay-Offs esifundazwe azobe eselandelwa akazwelonke okuhlunga amaqembu azokhushulelwa kwiHollywoodbets Super League. 

Kule sizini iSafa yehlukanise le ligi ngama-stream amathathu. I-stream ngasinye sinamaqembu ayisithupha okusho ukuthi iqembu ngalinye lidlala imidlalo emihlanu.

Lokhu kungenxa yokugwema izindleko zokuhambela imidlalo ekude ngenxa yokuhoxa kwabaxhasi bale ligi, iSasol. 

Imiphumela yeSafa KZN Sasol League:

Stream A: 

Dlala Ntombazane 1-0 DUT Midlands; Mshwathi Future Stars 2-1 Khananites; PSG Amabhaca Ladies 0-2 Newcastle Chess 

Stream B: 

UniZulu Ladies 0-0 Roman United; UKZN FC 0-1 Toti Ladies; All Stars 1-0 Sunflower WFC 

Stream C: 

Westville United 0-0 Darnall FC; Sapphire 0-1 DUT Coastal WFC; Diski Pros Academy 0-2 Lindelani Ladies