UMngqithi uxakwa ngabachitha uDion 'obukhali'
UMGADLI weLamontville Golden Arrows, uJunior Dion, umqeqeshi waleli qembu okholwa wukuthi ungomunye wabagadli abaseqophelweni eliphezulu kwiBetway Premiership
Image: BACKPAGEPIX
UMQEQESHI weLamontville Golden Arrows, uManqoba Mngqithi, ukholwa wukuthi umgadli wakhe uJunior Dion ungomunye wabagadli abaseqophelweni eliphezulu eNingizimu Afrika nacabanga ukuthi kuningi okusangalindelwa kuye.
UMngqithi ukusho lokhu ngemuva komdlalo wezakhe weBetway Premiership neDurban City wabakhaya baseThekwini, ophele zibambane ngo 1-1 ngoLwesibili, eChatsworth Stadium, eThekwini.
UDion, osayine kwi-Arrows emasontweni adlule emuva kokuxoshwa ngaMaZulu, useshayele Abafana Bes'thende amagoli amabili amqoka emidlalweni emithathu yePremiership. NgoLwesibili ushayele i-Arrows elokulinganisa kwiCity esiwombeni sesibili.
“Kade ngamthanda uDion, kusukela ngiqala ukumbona edlala kwiJwaneng (Galaxy) yaseBotswana kwiCaf Champions League ngisaqeqesha kwiSundowns (Mamelodi). Ngakho ngiyawazi amagalelo akhe njengomgadli. Ngokwami ungomunye wabagadli abaseqophelweni eliphezulu esinabo eNingizimu Afrika, ngakho ngiyamangala ukuthi kungani abanye bengaliboni ikhono kulo mdlali. Ukwazi ukusebenzisa unyawo lwesokunxele nelokwesokudla, unamandla emoyeni (ekungqomfeni ngekhanda) uyakwazi ukujika futhi ulisebenzela kanzima iqembu.
"Empeleni nje uyinkinga ebhokisini, uzithwalisa kanzima izitobha. Ngikholwa wukuthi kusekuningi asazokwenzela iqembu,” kusho uMngqithi.
Lo mgadli odabuka e-Ivory Coast ubebolekiswe wuSuthu kwiMarumo Gallants ngesizini edlule, kwazise abaqeqeshi bebengayiboni indawo yakhe esikimini.
Wayejoyine AmaZulu ngesizini ka-2023/24 esuka kuyona iGallants eyayimthathe kwiGalaxy yaseBotswana, walushayela amagoli ayisishiyagalolunye ngaleyo sizini. Kwi-Arrows ubanga ijezi noLungelo Nguse noBongani Cele.
Yize Abafana Bes’thende bekhombise ukuba yiqembu elingcono ngomdlalo kuneCity ngesiwombe sesibili emdlalweni wangoLwesibili ngendlela ebikwazi ukuligcina ngayo ibhola kodwa uMngqithi uyavuma iqembu lakhe alikabi yile nto ayifunayo.
“Ngibone sisayibambe ngakho endleleni yethu ebheke kulokhu esihlose ukukufeza njengeqembu, noma singakabi yile nto esiyifunayo kodwa kuyobonakala ukuthi liya ngokuya lihlangana leli qembu esilakhayo noma singakabaniki bonke ithuba abadlali esibasayinisile.”
Abafan Bes’thende bazobuyela ensimini ngomdlalo wasekhaya abazowudlala neMagesi FC ngoLwesithathu, eKing Zwelithini Stadium, eMlaza.