OwaMaZulu akafuni bazikhathaze ngefomu yeMarumo
U-BEN Motshwari waMaZulu FC, oxinwe u-Arthur Sales weMamelodi Sundowns, ungomunye wabadlali okubhekeke benze izinto zenzeke esiswini saleli qembu kowanamuhla weBetway Premiership neMarumo Gallants ePrincess Magogo Stadium
Image: BACKPAGEPIX
UMDLALI wasesiswini kuMaZulu FC, uBen Motshwari, ubona kungafanele ibathuse ifomu yakamuva yeMarumo Gallants engakahlulwa emidlalweni emibili yeBetway Premiership kodwa bathathe okuhle emidlalweni yakamuva ukulungisa amaphutha.
AmaZulu azotholana phezulu neGallants kowePremiership ePrincess Magogo Stadium, KwaMashu, ngo-7.30 ebusuku.
IGallants iza kulo mdlalo nje, ihambela phezulu njengoba isayinqobe yomibili imidlalo yePremiership esayidlalile. Ishaye iRichards Bay FC ne-Orlando Pirates ngo 2-1 ngokwehlukana.
AmaZulu ngemuva kokushaywa yiStellenbosch FC ngo 3-2 kuma-quartefinal eMTN8, avule isizini yePremiership ngokunqoba owasekhaya eguqisa i-Orbit College ngo 1-0. Alandele ngesibhaxu eguqiswa yiMamelodi Sundowns ngo 2-0 ngeledlule.
“Kufanele sivuke sizithathe ngalo mdlalo esizowudlala neMarumo ekhaya ngemuva kokushaywa kwethu yiSundowns, engikholwa wukuthi ukuba siwasebenzise ngendlela amathuba esiwakhile besingayinqoba.
"Empeleni indlela esisadlale ngayo emidlalweni emithathu esisayidlalile ukubala noweStellenbosch weMTN8, sisadlale kangcono kodwa saba neshwa lokungakwazi ukuwasebenzisa ngendlela amathuba esiwakhile.
"Ngakho sekufanele sidlule kulokho, sibheke emdlalweni olandelayo ngomoya wokulangazelela ukunqoba,” kusho uMotshwari obona ukudlalela kwabo ekhaya kuzoba yisikhuthazi kubona.
“Abalandeli bethu babambe iqhaza elikhulu ekusikhuthazeni emdlalweni wethu wokuqala ne-Orbit College, esikwazile ukuwunqoba. Noma yiliphi iqembu liyabadinga abalandeli abazolikhuthaza enkundleni uma lidlala, okuyingakho silindele okufanayo nakulo mdlalo esizowudlala neMarumo.”
Ngesizini edlule, iBahlabane Ba Ntwa ilugingqe kabili Usuthu emidlalweni emithathu edlalwe yila maqembu okubalwa oweNedbank Cup ngesizini edlule. Nokho uMotshwari ubona kungafanele bazikhathaze ngalokho.
“Noma sihluliwe emidlalweni emibili kwemithathu yakamuva esisayidlalile, kufanele sithathe okuhle kuyona bese silungisa amaphutha esiwenzile ngaphambi kokubhekana neMarumo.
"Akufanele sizikhathaze ngefomu yeMarumo kodwa sigxile kwesihlele ukuzokwenza ngosuku lomdlalo, okuwukulwela ukunqoba sibuye namaphuzu amathathu," kusho uMotshwari.
Khonamanjalo: Njengoba kuyinyanga yabesifazane, AmaZulu azosingenisa mahhala isibhuda esihlobe ngemifaniswano yeqembu. La mathikithi amahhala atholakala eSpar KwaMashu, Embelebeleni, Elangeni TVET College (Esivananda), Vibe FM, Izwi Lomzansi, DUT: ML Sultan, MUT Main Campus nasesitolo sezimpahla zoSuthu, i-AmaZulu Fan Experience