IMagesi izibophezele ngokugwema isibhaxu kweyePremiership

UKAPUTENI nonozinti weMagesi FC, u-Elvis Chipezeze, uthi yize bebuqonda ubunzima bokuyobhekana neMamelodi Sundowns okubukeka isiqalile ukuthola umgqigqo wayo kodwa kubalulekile kubona ukulwela ukugcina umgomo abazibekele wona wokungahlulwa emidlalweni emihlanu yokuqala yesizini yeBetway Premiership. 

IMagesi izobhekana neSundowns kowePremiership namuhla ngo-7.30 ebusuku, eSeshego Stadium, ePolokwane.

IMagesi isalwela ukunqoba umdlalo wayo wokuqala kule sizini esanda kuqala kwazise idlale ngokulingana nePolokwane City (0-0) neStellenbosch (1-1). 

Ngakolunye uhlangothi iSundowns evule isizini yePremiership ngokubambana ngo 1-1 neChippa United, ivuke ngokubhaxabula AmaZulu ngo 2-0 ngeledlule.

“Yize sibuqonda ubunzima bokuyobhekana neSundowns ekhombisayo ukuthi isiyaqala ukuthola umgqigqo wayo emidlalweni yakamuva esiyidlalile okubalwa nowePirates ewudlale ngempelasonto kodwa kubalulekile nakithina ukuthi sikulwele ukubambelela emgomeni wethu esizibekele wona wokuthi singahlulwa emidlalweni emihlanu yokuqala kule sizini. 

Ukugwema isimo sangesizini edlule sokuzithola sivika izembe ingxenye enkulu yesizini, sizibekele umgomo wokuthi sikulwele ukuthi emidlalweni emihlanu yokuqala singahlulwa. Ukungahlulwa kwethu emidlalweni emihlanu yokuqala kwesizini yikhona esikholwa wukuthi kungaba wumkhombandlela ezinhlosweni zethu zakule sizini zokuba yiqembu elingabalwa nhlobo navika izembe,” kusho uChipezeze. 

“Sinomgomo othize esizibekele wona wamaphuzu esizimisele ngokuwathola ngomzuliswano wokuqala. Siyazi ukuthi imidlalo esisazoyidlala ayilula kule emihlanu esizibekele umgomo wokungahlulwa kuyona kodwa sizolwa ngakho konke okusemandleni. Ngaphandle kwalokho umdlalo wethu neSundowns siyazi ukuthi ngeke ubelula neze ngoba kuhlale kungelula ukubhekana nayo.”

IDikwena tsa Meetse eqeqeshwa uJohn Maduka othathe izintambo ngaphambi kokuqala kwesizini ibingomakoti bePremiership ngesizini edlule. Imangaze abaningi idla isicoco seCarling Knockout ngokuguqisa yona iSundowns kowamanqamu. 

Ngemuva kokunqoba indebe yeCarling leli qembu laseLimpopo lidonse kanzima emidlalweni yeligi, kwaze kwaphoqeleka ukuthi lishintshe umqeqeshi. Kuqashwe u-Owen Da Gama olivikise izembe.

“Umqeqeshi uJohn unohlelo oluqondile lokufanele sikwenze ukugwema ukuvika izembe, futhi uyakholelwa kakhulu kithina esikhona eqenjini ukuthi asilona iqembu okufanele livike izembe kule sizini.”